Ka jingïasyllok ka ïarap ha ka jingmut jingpyrkhat jong u briew ryngkat ki dawai: Pastor L.E. Jyrwa

By Mawphor News Desk On Mar 4, 2024

Mawkyrwat, Lber 03: Ka Ophis treikam jong ka District Mental Health Programme (DM&HP), South West Khasi Hills District kaba hap hapoh ka jingpynïaid jong u District Medical & Health Officer (DM&HO), South West Khasi Hills District ka la pynlong ïa “ka Program ïa syllok halor kumno ban pynduna ïa ka jingma jong ka jinglong jingman ha ka ïaid ka ïeng hapdeng ki khynnah samla na ka jingshah pynngop ha ka ban pyndonkam ïa u Drok” ha kaba u Pastor L.E. Jyrwa, Pastor I/c Mawkyrwat District Counsellor, Counselling Centre, Jingïaseng Kynthei Mawkyrwat Presbytery, Member Life Care Foundation, Mawkyrwat u la long kum u Resources Person.
Ïa katei ka prokram la pynlong ha Multipurpose Hall jong ka ophis treikam jong u Deputy Commissioner, South West Khasi Hills District ha kaba la pynïaid ïa ka prokram da u bah T. Lyngwa, IAS, Deputy Commissioner, South West Khasi Hills District bad ka Smt. Y. Mawlong, Additional Deputy Commissioner. Kiba la wan ban ïashimbynta ha kane ka program ki kynthup ïa ki District Heads bad ki Staff jong ki Department bapher bapher jong ka South West Khasi Hills District.
U Pastor L.E. Jyrwa, Pastor I/c Mawkyrwat District Counsellor, Counselling Centre, Jingiaseng Kynthei Mawkyrwat Presbytery, Member Life Care Foundation, Mawkyrwat ha ka jingkren jong u ban ai jingpynshai lyngba ka Power Point Presentation u la kren halor ka phang, “Kumno ban pynduna ïa ka jingma jong ka jinglong jingman ha ka ïaid ka ïeng hapdeng ki khynnah samla na ka jingshah pynngop ha ka ban pyndonkam ïa u drok”, da kaba u ong ba ka jingkyrni ha ka jingpyndonkam ïa u drok ka long kawei ka jingeh kaba ktah ïa ka jingim shimet bad ha ka imlang sahlang.
“Ka jylla Meghalaya jong ngi mynta ka la don ha ka kyrdan kaba 12 ha ka jingdon jong 1.65% ha ka jingkheiñ ba mynta jong kiba pyndonkam ïa u droks”, u la ong bad halor ki jaid jingma jong ka ïaid ka ïeng ne jinglong jingman hapdeng kiba pyndonkam ïa u drok. U la pashad jingmut ruh halor ki katto kane ki lad kiba lah ban wanrah jingbha ne jingduna jong ka jingktah ne jingngop ha ka jingpyndonkam ïa u drok, kaba nyngkong ka kynthup ïa ka Early Intervention lane ka jingpeitbniah ne jingïada shwa ka por. Ha kaba ngi hap ban peit thuh ne pynithuh ïa ki stake holders lane ki briew kiba don ka mon sngewbha ban trei lang ha ka ban wan rah ïa ka jingbha ha ka imlang ka sahlang, kaba kythup ïa ki Myntri Shnong, ki nongtreikam Balang, Seng Longkmie, Senglong Kpa ba kiwei kiwei kiba kloi ban trei ha ka ban wanrah jingbha hapoh shnong ‘pohthaw.
U la ong shuh shuh ba kiwei pat ki kynthup ïa ka jingsngewthew ïa ka jingsngew bad ka ïaid ka ïeng namar ka don beit ka jingkylla ha ka ïaid ka ïeng jong uba la kyrni ha u drok. Namarkata, kaba donkam ka long ruh ka jingai ïa ki jingtip ne hikai ïa ki paidbah halor ki jingtip bapher bapher kiba ïadei bad kane ka bynta lyngba ka jingtip bniah halor ka jingsniew jong u drok. Ka jingpynithuh ïa u briew uba shimti ban hikai ne ïarap ïa kiwei pat halor kumno ban ïada ne kumno ban wad jingïarap lada ngop ha u drok. Kumta, ka counselling ne ka jingïasyllok ruh ka dei kawei ka ban ïarap ha ka liang ka jingmut jingpyrkhat jong u briew ha ryngkat ki dawai.
U la ai jingmut ruh ba dei ban pynkhlaiñ ha kaba ïa dei bad ka aiñ ne bad ka rukom pyrkhing ban ïada khnang ban ïarap ban ïada na ka jingpyndonkam ne pynïaid be-aiñ ïa u drok ka long kaba donkam bad kawei de ka jingaibor ne pynkhlaiñ ïa ka jingsngew ha lade ïa ki briew kiba la ngop ha u drok da kaba lait na ki jingshah i-beiñ ne kren beiñ hapoh shnong ‘poh thaw, ka jingshah kyntait ha ki briew, ha ki kam ki jam bad ha kiwei kiwei kaba donkam bad kawei pat ka long kumno ban lait na ka jingngop ha u drok lane ka jingpyndonkam ïa u drok ka long ka ba kongsan eh lyngba ka jingïatreilang da kaba sdang na ka ïing kata na ki kmie ki kpa, ka shnong ka thaw, ki nongtrei ha ka koit ka khiah, ki pulit bad kiwei kiwei kiba don bynta ha ka imlang sahlang.
U Dr. F.R. Lartang, DM&HO, South West Khasi Hills District u la kren khyndiat halor kumno ka ophis ne kum ki department bapher bapher kin lah ban leh ha kaba ïa dei bad u drok. Kum ki department bapher bapher ngi dei ban ïatrei lang bad ban wad ki lad kumno ban ïada na ka jingshah ktah ha u drok”, u la ong. U la ïathuh ruh halor ka kumno ka treikam ka OST hapoh Mawkyrwat bad ba ki briew ki lah ban ïoh jingïarap na OST, Mawkyrwat ki lah tang kito kiba lah ïoh jingsumar shwa na Shillong namar ïa mynta hi ym pat don Psychiatrist.
U Dr. W.L. Narry, District Nodal Officer, South West Khasi Khasi Hills District u la kren ruh halor ka jingkiew stet jong ka jingshim noh ïa ka jingim lade jong ki briew. U la kren ruh halor ka jingwan rah ïa ka OST hapoh South West Khasi Hills District kaba long ruh kawei ka liang ha ka ban pynlait na ka jingïoh ïa ka HIV/AIDs.
Ka kong Y. Mawlong, Additional Deputy Commissioner, South West Khasi Hills District ha ba pynkut ïa ka jingïakren ne jingïa ai jingmut ka la ong ba kane ka program ka long ba ïarap bha bad kaba donkam bha. Ka la ïathuh ruh ba ka Social Welfare Department ka la thmu ban pyntreikam ïa ka Meghalaya Drug Abuse Prevention Policy bad ka donkam ruh ka jingïatreilang jong ki ophis treikam bapher bapher ka ba kynthup ïa ka Sports Department, C&RD Block, Transport, Police bad kiwei kiwei namar da ka jingïatreilang yn lah bn pynduna ïa ka jingpyndonkam ïa u drok.