Nongpoh, Lber 03: Ha kawei na ka jingtyngkhuh Kali kaba la jia mynta ka sngi U Blei ha Ri Bhoi, u Dribar ka Maruti Car u la lait salit na ka jingmynsaw kaba dei hadien ba katei ka Kali kaba u ñiah ka la shah rad kynsan ha ka Trok.
Kane ka jingjia ka la jia ha ka surokbah National Highway-6 ba hap hajan Saiden kumba ha ka por 12.30 baje mynsngi, ha kaba kawei ka trok kaba don ïa u number ML 05 U 7080 bad ba la ñiah da u John Dkhar ka la rad ïa katei ka Maruti Car kaba don ïa u number ML 05 F 0872 bad ba la ñiah da u John Kenny Longshiang.
Ha kane ka jingjia, u Dribar ka Maruti Car u la lait salit na ka jingmynsaw jur bad u la shu pangmet pang phad, namar ba katei ka Trok ka la lah ban sangeh noh hadien ba ka rad ïa katei ka Maruti Car.
Kumba la lap bad sakhi, kane ka jingjia ka la kham sngewma, namar ba ka trok ka la ioh ban rad ïa katei ka Maruti car bad donbok noh ba u Dribar u la lah ban bat brake, ha kaba katei ka Maruti Car ka la julor na ka phang jong u Dribar bad katba u Dribar pat u la shu pangmet pangphat khlem da mynsaw jur.
Halor kane ka jingjia, ym lah ban batai shai mano ba bakla haduh ba ka trok ka la ioh lad ban rad ïa katei ka Maruti Car kaba la shakut syndon hapdeng surok, hynrei ki bor pulit na Nongpoh Police Station tang mar ïa ioh jingtip ki la wan poi sha katei ka jaka na ka bynta ban pynlong ïa ka jingtohkit kaba bniah.
