Nongstoiñ, Rymphang 3: Da ka jingthmu ban kyntiew ïa ka sap trei jingtrei bad ban pynïajan hapdeng ki nongai kam, ki nongïoh jingmyntoi kiba la tbit bad ki nongseng kam seng jam lajong, ka ophis jong ka Meghalaya State Skill Development Society (MSSDS), ka tnad Labour, Employment and Skill Development, ha ka 5 bad 6 tarik Lber 2024, kan sa pynlong ïa ka prokram kaba la tip kum ka ‘Skillerate Connect Event’.
Kane ka prokram kan dei ka prokram kan ai buit ai bor ïa ki khun samla, ba kin trei ïa ki kam ki jam ha ki karkhana bad kiwei kiwei, kumjuh ruh ba kin nang ban seng ïa ki kam lajong. Kane ka prokram kan long ha madan New Nongstoiñ, West Khasi Hills District.
Ha kine ki ar sngi, kin don bun jait ki ki prokram kaba kynthup ïa ka jingwan jong ki nongai kam na ki kynhun bad ki company ki bapher bapher ban pynrung kam ïa ki samla kiba tbit ha ki liang kiba pher kum ha ka kam rep kam riang, Information Technology, kam jngoh kai pyrthei bad kiwei kiwei de.
Kin don ruh ki dukan kiban die ïa ki jingdie kiba bun jait kiban sa pynieng ha katei ka jaka kaba kynthup ïa ki dukan die jingbam, soh waiñ, dukan jaiñ, dukan die syntiew bad kiwei kiwei de.
Kiba wan sha katei ka prokram kin ïoh shibun ki jingmyntoi ha kaba ki lah ban register ïalade na ka bynta ki training prokram ki bapher bapher, kumjuh ruh ba kin ïoh jinghikai halor ki skhim sorkar bad ki ram kiba ki bank ki ai bad ki jingshakri kiba ki tnad sorkar ki ai.
Ha ka 5 tarik Lber 2024 por 1:30 nohphai sngi kin don ki prokram pynbyrngia paidbah, ka ban sa ai da u Bah Gilbert Thongni, bud sa da ka kynjat bol paralok na ki briew kiba lah ha kiwei pat ki bynta bad ka jingïatied Pohdun, ka jingïalehkai kaba ju ïalehkai bha da ki briew ka thaiñ Nongstoiñ.
Ha ka 6 tarik Lber 2024 ha ka por 2 baje nohphai sngi, ka Northeast Institute of Professional Studies (NeIPS) kan sa pynlong ïa ka jingïakop pyni riam bad ka kynhun Shaphrang Ngin Tur jong u Bah Blom, kin sa wanrah ïa kawei ka Drama kaba pynphalang halor ka ‘Jingdonkam jong ka Sap/Jingtbit’.
