Ka jingpyntreikam ïa ki saw tylli ki Labour Code ba thymmai ka pyni ïa ka sienjam kaba kongsan ban kyntiew ïa ka jingsuk ha ka rukom im na ka bynta ki nongtrei kiba bun jong ka India, khamtam eh ïa kito kiba trei ha ki kam bym pat pynbeit ryntih bad bym don jingpynbeit. Kine ki jingpynkylla ki thmu ban pynthikna ïa ka jingsiew kaba rit tam na ka bynta baroh ki nongtrei, khlem ki jingeh jong ki thup bapher bapher ha ki karkhana. Da kaba wanrah ïa ki kot pynshisha (identity card) ba donkam na ka bynta uwei pa uwei u nongtrei, ki Code ki ïaleh ban pynkupbor ïa ki ban ïoh beit beit ïa ki jingmyntoi ha ka imlang sahlang.
Ka jingpeit bniah ïa ka koit ka khiah man ka por bad kaba dei ban leh kan ïarap ban ïada ïa ka bha ka miat jong ki nongtrei, kaba ïarap ïa ki ban im ka jingim kaba koit ba khiah bad kaba kham seisoh. Shuh shuh, ka rukom pynbeit ïa ki jingeh kaba la buh por ka kular ban pynduna ïa ka jingban khia ha ka bor pyrkhat bad ka jingbym thikna kaba ki nongtrei ki ïakynduh. Baroh, kine ki sienjam ki pyni ïa ka rukom treikam kaba ïaid shaphrang kaba pynleit jingmut ha ka burom, ka jingshngaiñ, bad ka roi ka par kaba kynthup lang ïa baroh ki nongtrei jong ka India.
Hynrei wat hapdeng kine ki kyndon kiba bha, kawei ka bynta jong ki seng pdeng jong ki nongtrei kiba don ka jingkyrshan na ki kynhun saiñ pyrthei ki ju pyndonkam da ki jingïakhih, bunsien khlem da pyrkhat bha ïa ka jingktah kaba sniew jong ki. Kum kine ki jingïakhih ki wanrah ïa ka jingduhnong kaba khraw ha ka bainong, khamtam ïa jan 380 million ngut ki nongtrei ha ka ïoh ka kot kaba khlem pat pynskhem, kiba shaniah ha ka kamai kaba man ka sngi na ka bynta ban im. Ha ka jaka ban pynbeit ïa ki jingeh jong ki, ki jingïakhih kiba ju jia man ka por ki pyntlot ïa ka rukom treikam jong ka jingïateh kular kaba tei bad kaba pyrkhing, da kaba pynduh ïa ka lad ban ïoh ïa ki jingmih kiba hok bad kiba ryntih na ka bynta ki nongtrei bad ki nongpyntreikam kumjuh.
Katba dang ïaid ka por, ka jingkhot ïakhih biang ka pyni ba kam long kaba seisoh bad kaba ktah ïa ka jingthmu. Ka jingbun jong kum kine ki sienjam ka la ïalam sha ka jingniah kaba jur hapdeng ki nongtrei, kaba la pynlong ïa kiba bun ban ym ïashim bynta ne ban kyntait ïa kine ki jingkhot. Ha ki katto katne ki khep, katto katne ki nongtrei kim banse ban ïashim bynta ha ki jingïakhih pyrshah ïa ka mon jong ki, kaba pynsniew shuh shuh ïa ka jinglong hok bad ka jingkhlaiñ jong kine ki jingïakhih. Ha kaba kut, kane ka jinglong ka pynduna ïa ka jingseisoh jong ki sienjam ba ïadei bad ka bha ka miat jong ki nongtrei bad ka pyntlot ïa ka jingïatylli hapoh ka kynhun ki nongtrei.
Ki jingma kiba kham ïar jong ki jingïakhih kim sahkut ha tang ki jaka trei. Ka jingpynmih mar ha ki karkhana ka shah ktah, ki nongleit nongwan man ka sngi ki mad ïa ki jingeh kiba jur, bad ka kamai kajih jong ki nongdie jingdie ha surok, ki nongtrei ïing, bad ki nongpynbiang ïa ki kam ai jingshakri kiba rit baria ki shah pynthut. Na ka bynta kine ki nongtrei, wat tang shisngi ka jingduhnong ka lah ban pynmih ïa ka jingeh ha ka kamai kajih, kaba pynbor ïa ki ban pynlut ïa ka pisa ba ki la lum bad ban ngam kham jylliew shuh shuh ha ka jingbym shngaiñ ha ka liang ka ïoh ka kot.
Ha ki ri kiba dang kiew kum ka India, ki seng jong ki nongtrei ki dei ban buh hakhmat eh ïa ka jingïakren, bad ka jingïatreilang kaba tei bad ki nongpyntreikam bad ka sorkar. Ka rukom kaba la pynshong nongrim ha ka jingïakren kaba ïaineh bad ka jingïatreilang ban pynbeit ïa ki jingeh ka lah ban pynbeit ïa ki jingeh jong ki nongtrei khlem da pynthut ïa ka kam shna tiar, ka ïoh kam ïoh jam, bad ka jingkiew ka ïoh ka kot. Ha ka jinglong kaba mynta, ki seng jong ki nongtrei ha ka ri, kiba la nang duh noh suki suki ïa ka bor jong ki, ki donkam ban bishar bniah ïalade bad ban pynïadei bad ki rukom treikam kiba kham tbit bad kiba peit shakhmat kumba leh shawei pat.
Ki nongtrei jong ka India ki dei ban long kiba la pynbeit ryntih da ka jingthmu kaba pura kaba ban jur ia ka jingsukha ka rukom im, ka jingshngain ha ka imlang sahlang, bad ka jingïadei kaba bha. Ka jingpynbeit ïa ki jingïakynad lyngba ka jingïakren ban ïa kaba ïaleh pyrshah kan pynthikna ba ka rukom treikam kan ïai bteng khlem jingthut bad ka kor jong ka roi ka par jong ka ri kan ïai bteng ban iaid beit ïaid ryntih. Tang lyngba kum kine ki rukom treikam kiba ïadei bad kiba treikam lah ban pynkhlaiñ bad ïada shisha ïa ki hok jong ki nongtrei ha ki por ban wan.
(U nongthoh u dei u National General Secretary, Trade Union Co-ordination Centre (TUCC)).
