Shillong, Rymphang, 05: U Kyrtong MP ka Seng VPP, u Dr. Ricky Syngkon, u la ong ba ka daw ba ka Seng ka la pyrshah jur ïa ka jingtuklar ka sorkar ïa ka Lokayukta, namar kam kwah ba ka Jylla kan shah lynshop ha ka jingbamsap, namar ka jingbamsap ka ktah lut ïa ka koit ka khiah, ka pule puthi bad kiwei kiwei de ki jingim ba man ka sngi jong ki briew.
Haba kren ha ka jingïalang jong ka Seng kaba la long ha Malki Point mynta ka janmiet, u Dr. Ricky u la pynshai ba lada ka Lokayukta ka khlaiñ ka mut ka jingbamsap ruh kan Duna bad kiba thmu ban bamsap ruh kin nym nud.
Hynrei kumba long mynta lada ka Lokayukta kaba la thung khnang ban tohkit ïa ki kam bamsap ka tlot bad ka shah mushlia bad shah tuklar ha ki bor sorkar, ka mut ki ophisar ne kiba don ha jingtreikam ka Lokayukta kin nym nud ne lah ban tohkit ïa ki kam bamsap.
Haba pynshai shuh shuh u la ong ba ka jingbamsap ka pynlong ïa ki hospital ne kiwei pat ki jaka sumar kim biang ki dawai ne ka sorkar kan lah ban pynbiang ïa ki dawai, ki kor ki bor ne ban thung ki Doktor ki Nurse bad kiwei kiwei pat ha ki hospital, kaba mut ki paidbah kin hap mad ïa ki jingeh bad kim ïoh ïa ka jingsumar kaba biang.
Kumjuh ruh lada ki jaka pule kim biang, kim don ki Nonghikai kiba biang ne ba ka sorkar kam lah ban thung Nonghikai ka mut ka pule puthi jong ki Khynnah kan shah ktah.
Kumta u la ong ba ki paidbah kidei ban ieng pyrshah ïa ka jingtuklar ka sorkar ïa ka Lokayukta khnang ba kan lah ban treikam bad ïakhun pyrshah ïa ki kam bamsap.
