Pan jingpynshai ka RBPC bad MPSO na u DC ba pynslem ban pynbna ïa ka result ki post DSC-Bhoi

Nongpoh, Rymphang 05: Namar ka jingsngewkhia halor ka jingud jingnam ki samla wad kam kiba la thep kam ïa ki post bapher bapher hapoh ka DSC Ri Bhoi, ki nongïalam ka Ri Bhoi Peoples’ Council (RBPC) bad ka seng MPSO, Women Wing Ri Bhoi mynta ka sngi ki la leit syndon ban kynduh ïa u Deputy Commissioner ka Ri Bhoi na ka bynta ban wad jingtip halor ka daw ka jingpynslem ban pynbna ïa ka result ki post DSC ha Ri Bhoi District.
Haba leit ban ïa kynduh ïa u Deputy Commissioner ka Ri Bhoi bad uba dei ruh u Chairman ka DSC Ri Bhoi, u Arpirt Upadhayay, la ïalam da u President ka RBPC, u Samla Jayson Lennox Nongrum bad ka President ka MPSO Ri Bhoi, ka Kong M. Wanniang bad ryngkat ki dkhot ha kaba ha kane ka jingleit kynduh ki la aiti ruh ïa ka dorkhas ban wad jingtip halor ka daw ka jingpynshlem ban pynmih noh ïa ka result ki post DSC ba la khot naduh u snem 2021-2022.
Kine ki nongïalam ki ar seng, ki la leit ruh ban ïa kynduh ïa u DC ka Ri Bhoi, ka dei halor ka jingsngewkhia kaba jur halor ka jingpynshlem ban pynmih ïa ka result ba bun ki samla kiba ïa khun ïa katei ka kam ki la pynpaw ïa ka jingsngewkhia naba la pynslem ban pynmih ïa ka result.
Haba kren sha ki Nongthoh Khubor, u President ka RBPC, u Samla Jayson Lennox Nongrum, u la ong kum ka seng ryngkat kine ki seng longkmie ki la shim ïa kane ka bynta ban kynduh syndon ïa u DC ka Ri Bhoi, ka dei namar ba bun ki samla ki la pynpaw sha ka seng ba ki da sngewkhia halor ka jingpynshlem ban pynbna ïa ka result jong ki kam bapher bapher ba la pynlong da ka DSC Ri Bhoi.
U la ïathuh ruh kumba la pynpaw da u DC ka Ri Bhoi ka don hi ka jingeh ha kaba pynmih kloi ïa katei ka result thungkam ka DSC ha Ri Bhoi, kaba dei na ka daw ba ki department kim pat wan phah ïa ka roster system sha ki tnad ba dei peit ïa ka roster system ka sorkar jylla bad ha ka miej jong u, u la pyndep lut ban leh ïa kiba donkam bad mynta ka sah sa tang ha ka roster system ba dang hap ban pynbeit ha kaba wat la katta ruh un sa shim khia katba lah ban pynbna kloi noh ïa kane ka Result jong ki post DSC.
Namarkata, na ka liang ka seng kim don ei ei ban pyrshah ïa ka bor synshar District ne ïa ka sorkar bad kane ka jingmih ka seng ban kynduh ïa u DC ka long ban pynsted ha kaba pynbna noh ïa ka result katei ka post DSC bad la kumno kumno ka seng ka dawa ba la kumno kumno kumno ka result dei ban pynbna noh haduh u bnai Lber 2024 bad lada slem ka seng kam banse ban ïaid da kawei ka lynti ban myntoi ki khun samla ha ka liang ka ioh kam ka ioh jam.