Ka Jaidbynriew hakhmat ka niam hadien ong u President ka KSU
Jied ki 5,177 ngut ki dkhot ia ki nongialam ba thymmai
Shillong, Jymmang 06 : U President ka KSU, Bah Lambokstarwell Marngar ha ka sngi Saitjaiñ u la ong ba ka KSU kam buh satia ïa ka niam ha khmat hynrei ka buh shwa ïa ka Jaidbynriew.
Ïa kane utei u nongïalam ba rangbah jong ka KSU u la kren hadien ba la dep ban pynbna ïa ki nongkitkam ba thymmai jong ka KSU Central Executive Council na bynta ka samoi treikam jong u snem 2023-2026 kaba long hynne ka sngi ha Dinam Hall Jaïaw.
“Nga ïohi ka jingwanrah ïa ka jingsngewpher thain, wan sa ka jingsngewpher bad kaba kham sheptieng shuh shuh ha kine ki sngi ka long ka la sdang rung sa kata ka jingsngew niam. Ka KSU kam buh hakhmat ïa ka niam ka buh hakhmat ïa ka Jaidbynriew bad lada don kita kiba pharia ïa ka Jaidbynriew lyngba ka niam, ka KSU kan sop kan spain,” u la ong.
Shuh shuh u la ong ruh haba ka Jaidbynriew ka skhem ki don ki bor kiba pyrshang da ki buit bapher bapher da ka sain pyrkhat ban jop thma kumno ban pynjot pynpra.
Da kaba ong ba kane mynta ka hap ha ki tyrpeng jong ki dkhot ka KSU, u President u ong ruh ba kum ki dkhot ka seng kin kynduh shibun ki jingeh ha ka jingïaid lynti. “Hynrei ngin ïaid ryngkat ryngkat da ka bor met kaba khlain bad ka bor jabieng kaba khlaiñ.
Lah ban kdew hangne ba ha kane ka jingjied ïa ki nongïalam ba thymmai jong ka KSU, ïa ka kam President, Vice President bad General Secretary ym shym la don satia ba aireng pyrshah kumta kitei ki lai ngut kiba jop suk ki kynthup ïa u Bah Lambokstarwell Marngar kum u President, nangta u Bah Donald V Thabah kum u General Secretary bad u Bah Biangbor Paliar kum u Vice President.
Kiwei pat ki nongïalam ki kynthup ïa u Reuben Najiar – Assistant General Secretary, Raymond Kharjana – Organising Secretary, Pynkmenlang Sanmiet – Education Secretary, Pynshaiborlang Rani – Information & Publicity Secretary, Spaindorsing Lyngkhoi – Office Secretary, Erick A Nongkynrih – Sports & Cultural Secretary bad u Shiningstr Kharbihkhiew kum u Environment Secretary.
La pynbna ruh ha kane ka sngi ba ïa kitei ki nongïalam ba thymmai yn sa pynskhem bad pynsmai ha kine ki khyndiat taiew ban wan.