Haba ngi la ïashongkha haduh ban da ïap, ai ba kane ka jingïathoh kan neh pateng la pateng: Prestone

Shillong, Jymmang, 06: Ka National Peoples Party (NPP) kaba la jop haduh 26 ngut ki MLA ha ka elekshon sha ka Iingdorbar Thawain ka jylla kaba dang shu dep long shen ha u bnai Rymphang, 2023, mynta ka la kynjoh sha ka jingbunpaid kaba 28 ngut da ka jingpynïasoh pura jong ki arngut ki MLA ka Peoples Democratic Front (PDF).
Da ki spah ngut ki nongkyrshan lem bad ki nongkitkam jong ka PDF na ki Unit bad ki Circle bapher bapher jong ka party ki la sakhi lang ha kane ka sngi ba la khylliap lama syndon ïa ka PDF ha kane ka jylla Meghalaya hadien ba la pynkha ïa kane seng saiñpyrthei ha u snem 2017 shwa ka elekshon kaba la long ha u snem 2018.
Ka NPP ka duna mynta sa tang lai ngut ki MLA ban ïoh syndon ïa ka jingbun paid kaba 32 ngut hapoh ka Iingdorbar Thawain kaba don 60 ngut ki dkhot.
Ha ka jingïalang pdiang burom kaba la long ha ophis treikam jong ka National Peoples Party (NPP) ha nongbah Shillong, u President jong ka PDF u Bah Gavin Miguel Mylliem bad u National President jong ka NPP u Conrad Kongkal Sangma ki la ïasoi ïa ka dulir pynïasoh kaba don 11 tylli ki mat.
La sakhi lang ïa kane ka jingpynïasoh jong ka PDF sha ka NPP da u National Vice President jong ka NPP u Bah Bah Prestone Tynsong, ki MLA kiba kynthup ïa u Bah Sniawbhalang Dhar, ka Dr. Ampareen Lyngdoh, u Bah Comingone Ymbon, u Marcuise Marak lem bad ki nongïalam ka NPP.
U National Vice President ka NPP u Bah Prestone Tynsong haba kren ha kane ka jingïalang, u la ong, ‘kane ka dei ka jingïathoh shongkurim kaba paka. Ki arngut ki briew ki ladep ïasoi ïa ka soskular ïathoh hapdeng u Bah Gavin bad u Conrad. Mynta kine ki la ïalong kawei. Ngi dei ban sngewthuh ba ka jingïalong kawei ka pynlong ïa ngi ka kynhun kaba khlaiñ.”
“Ka jingïalong kawei na ki ar kan pynkhlaiñ ïa ka party jong ngi,” la ong shuh shuh u Bah Prestone.
“Mynta ka kynti ki nongïalam jong phi, ki arngut (Bah Gavin M. Mylliem, Bah Banteidor Lyngdoh bad u Bah Auspicious Lyngdoh Mawphlang) ki dei ki briew kiba ïaid da ka lynti kaba dei. Thik ka pa thik naduh ka tynrai, haduh ka District Level. Kat ka shongkha shongman kam dei kaba suk ïoh ïashong tang hynriew bnai ne tang shi snem kata ruh kam long. Haba ngi la ïashongkha, haduh ban da ïap. Ai ba kane ka jingïathoh kaba ngi leh mynta ka miet kan neh pateng la pateng,” la pyndait nia u Bah Prestone.
Shwa kane, u MLA jong ka Mawkynrew u Bah Banteidor Lyngdoh u la ong, “Ym ju don satia u paralok ba shirta lane u nongshun ba shirta ha ka kam sain hima sima.
U President ka PDF u Bah Gavin M. Mylliem uba long ruh u MLA jong ka Sohra ula ong ba ka rai ban bynrap lang ka dei u soh jong ka jingtreikam hapoh ka jingïalam u Myntri Rangbah u Conrad K Sangma bad ka Sorkar MDA, kaba la pynsngewthuh ïa ngi ba ka ‘Meghalaya kaba kham bha” hapoh jong u.
“Namar ka dei ha ka jingïalam jong u (Myntri Rangbah) ba ngi la ïohi ïa ka Meghalaya kaba kham bha. Ki briew ki lah ban kynnoh shibun kiei kiei hynrei hadien ba ngi la ïakren bad ki nongkyrshan jong ngi, ngi la shim ïa ka rai kaba dei eh,” ong u Bah Gavin.
U General Secretary ka PDF u Bah Auspicious Lyngdoh Mawphlang u la ïai ban ban kam ba ka PDF ka dang dei ka party kaba dang im bad kaba khlem pat khylliap lama.