Shillong, Risaw 20 : U MP jong ka Congress na Tura Parliamentary Constituency, u Saleng A Sangma u la ong ba ka elekshon shiteng samoi ha Gambegre kan dei ka elekshon kaba ki paidbah jong katei ka constituency kin pyni ïa ka dak ïano ki shaniah ban long kum ki nongmihkhmat.
Kumban shu pynkynmaw hangne, ka jingwan jong ka elekshon shiteng samoi ha Gambegre kadei hadien ba u MLA ka thaiñ u Saleng A Sangma u la shah jied noh kum u MP ba thymmai ka Tura seat.
Na ka liang u Saleng haba kren bad katto katne ngut ki nongthoh khubor, u la ong, “Kane ka elekshon kadei ka jingshaniah jong ki paidbah ïa ki kyrtong kiba ki imon bad i shaniah ban ïalam kum ki nongmihkhmat thymmai. Kane kam dei satia ka jingïakhun hapdeng ki party.”
Shuh shuh u ong ruh ba um ju kwah ba ki party kin shu pynbiej kai ïa ki paidbah tang namar ba don ka elekshon. U ong ruh ba kam long ruh kaba itynnad ban shu burom ne niewkor ïa ki paidbah tang shwa ka por thep vote hynrei da la kut pat ka elekshon baroh ki long biang kumjuh.
Ha kajuh ka por u Saleng u ong ruh ba um pdiang satia ïa ka jingmih ki khubor ba ka jingïakhun ha kane ka elekshon shiteng samoi ha Gambegre ba kan dei hapdeng ka NPP – Congress lane TMC. U ïai ban beit ba ka jingïakhun mynta ka kynti kan dei beit ka jingshaniah u paidbah kaba u la dep rai ïano un kyrshan.
“Kumta, khatduh hi dei ka jingieid bad ka jingshaniah u paidbah uba la dep tip lypa ïano kin jied,” u la bynrap biang.
Kumba long haduh mynta hi, ki party kiba la pyntikna ban aireng ha kane ka elekshon ki kynthup ïa ka kyrtong jong ka NPP ka Dr. Mehtab Chandee A Sangma kaba dei ruh ha kajuh ka por ka kurim jong u Myntri Rangbah ka Jylla.
Nangta na ka All India Trinamool Congress (AITC) ka la pynieng da ka MDC jong ka Garo Hills Autonomous District Council (GHADC) na Dengnakpara ka Sadhiarani M. Sangma kaba dei ruh ka kurim jong u MLA barim ka Rangsakona u Zenith M. Sangma.
Nangta na ka Congress pat ka la sei da u Jingjang M Marak, u ba dei ruh ha kajuh ka por u paralok ba jan tam jong u MLA barim bad MP ba mynta ka Tura, u Saleng A Sangma.
Lah ban kdew hangne ba ïa ka Gambegre Constituency la mihkhmat da u Saleng A. Sangma hynrei hadien ba u la jop kum u MP ba thymmai ka Tura u la resaiñ noh kum u MLA.
Watla ka elekshon shiteng samoi ha katei ka constituency ka sah mynta sa tang kumba shi bnai duna hynrei ym pat lah pat ban ong sa katno ngut ki kyrtong kiban mih namar ki dang don bun ki party ba don ha ka jylla kiba khlem pat ai dak la kin sei kyrtong neem. Nalorkata, khlem pep kin don ruh ki kyrtong shimet kiban mih ban aireng lang.
