Ka dei ka kam khawpud ong u Conrad ïa kiba pynïap ïa ki nongïalam niam Baptist ha Manipur

Shillong, Jymmang 15 : U Myntri Rangbah ka Jylla, Conrad K Sangma ba dei ruh u National President ka NPP, ha ka sngi Palei u la ong ba ka jingpynïap ïa ki nongïalam niam Baptist ha Manipur ka dei ka kam khawpud bad kumta u la kyntu ïa ka sorkar jylla bad ïa ki paidbah ka Manipur ba kin treilang na ka bynta ban wanrah biang ïa ka suk ka sain.
Ha ka jingïakren bad ki lad pathai khubor, u Conrad u la ong ba ki kam ïa umsnam la ka long ha kano kano ka rukom ka dei kaba ym lah satia ban pdiang, ha ka party jong u.
“Na ka party jongngi, ngim lah satia ban pdiang ïa kino kino ki kam thombor. Ka rukom thombor bad pynïap ïa ki nongïalam niam bad ka jingduh ei ki mynsiem briew kadei kawei pat kaba ngi pynrem jur na ka liang ka party,” u la ong.
Ha kajuh ka por u Myntri Rangbah u la kyntu ruh ïa ka jingïatrei lang jong baroh na ka bynta ban wallam biang ïa ka suk ka sain ha ka jylla. “Ngi kyntu jur ïa ka sorkar jylla bad kumjuh ïa ki nongshong shnong ka Manipur ba ngi donkam ban pyntikna ba ki kam ïa umsnam ki dei ban sangeh noh da kaba ïatrei lang ha kaban wallam biang ïa ka suk ka sain ha Manipur,” bynrap biang u Conrad.