Ha kajuk jong ka jingïakhun, ka jingnang jingstad ka long ba donkam tam ïa ki khynnah skul: Lambor
Pynhap pyrda ka skul Umïew Presbyterian LP ïa ka jingdap 50 snem
Shillong, Jymmang 15: Ka shlem kaba pyn phriang ïa ka jingnang jingstad ïa ki hep kiba rit ka Umïew Presbyterian LP School, mynta ka sngi kala pynhap pyrda noh ïa ka jingrakhe dap 50 snem ne ka jubilee ksiar ha ryngkat ka jingrakhe kaba shongkun bha.
Ha kane ka sngi u MLA bad MDC barim jong ka Nongkrem u Bah Lambor Malniang u la long kum u kongsan ha ryngkat bad ki Tymmen Basan jong ka Balang Presbyterian Umiew nalor kiwei de kiba shah khot sngewbha.
Ïa kane ka skul la seng ha u snem 1976 bad ha kato ka por ki khynnah skul ki don kumba 94 ngut bat tang iwei i nonghikai bad katba dang ïaid ki snem kala ka skulk ala sdang ban kiew bad mynta ki khynnah skul kila don hapoh ka ar spah ngut.
Kum shi bynta ban ïa don bynta lang ha kane ka jingpynhap pyrda jong ka Umïew Presbyterian LP School ïa ka jingpynhap pyrda ba rakhe dap 50 snem u Bah Lambor Malniang u la noh synniang da ka pisa sha ka managing committee.
Haba kren kum u kongsan u Bah Lambor u la ong ba u dap da ka jingkmen namar ba ha ka por ba u dang long tang kum u riew madan u la don bynta bad kane ka skul ha ka por ba rakhe ïa ka jingdap 25 snem bad pynpaw ruh ba u long uba donbok ban don bynta biang ha ka jingdap 50 snem jong kane ka skul.
“Nga la don ka jingiajan ka jong nga bad kane ka skul bad nga shim kum u trai jong kane ka skul bad nga ju ïa snohkti lang ha ki por ba lah dep” ong u Bah Lambor.
Kane ka skulk ala sei ïa ki shipai ki ban iada na ka bynta ka ri baroh kawei bad kala sei ruh ïa ki samla ban rung ha ki kam pulit, kumjuh ruh kala sei ïa ki rangbah ban long ki nongialam ha ka Balang bad kala sei ruh ïa ki nonghikai kiba la hikai mynta ha kane ka skul, u la ong.
“Haba ngi ïa shong lang mynta hangne, to ngin ïa pyrkhat na ka bynta sa 25 snem ban wan bad ym dei ban pyrkhat na ka bynta ka lashai hynrei ngin pyrkhat sa ïa ki 25 tylli ki snem ki ban sa wan ba kumno ngin leh na ka bynta kane ka skul, aiu ngin pyrkhat bad kumno ngin pyntyllun ïa ka” ong u Bah Lambor.