Shillong, Lber, 15: U State President ka BJP Rikman G. Momin ha ka sngi Thohdieng u la ong ba ka Citizenship Amendment Act, 2019 ka dei ka lynnong kaba la khylliap ha Meghalaaya namarba katkum ka Rule jong kane ka aiñ ka la pyllait noh ha ki jaka kiba hap hapoh ka Sixth Scheduled.
“Ka State BJP ka ai khublei ïa ka Sorkar India bad khamtam ïa u Myntri Rangbahduh ka ri Narendra Modi, u Myntri ka tnat Kam Pohing u Amit Shah kiba burom ïa ka jingsngew jong ki riewlum da kaba pyllait ïa ki jaka ba hap hapoh ka Sixth Schedule na ka Citizenship Amendment Act, 2019,” ong u Momin ha ka jingïakren bad ki lad pathai khubor.
“Ha ka Aiñ barim jong u snem 1955 ka jingpyllait ïa ki jaka kiba hap hapoh ka Sixth Schedule kam don. Ïa kane la pynrung ha ka aiñ jong u snem 2019 da ka Sorkar BJP. Ka BJP ka burom ïa ka jingsngew jong ki riewlum bad ka wanrah ïa kane ka jingpyllait,” ula ong.
“Kane ka sienjam ba la shim da ka Sorkar Pdeng ka long ban pynthikna ïa ka jingkular jong ka Sorkar ba la ïalam da u Modi ban kyntiew ïa ka jingim jong ki jaidbynriew riewlum lyngba ki skhim bapher bapher. Mynta ka Meghalaya ka la lait na ka CAA bad kam don nongrim satia ïa kito kiba pyrshah ban dang kren kulmar hynrei kum ki nongshong shnong jong kane ka ri ngi dei ban trei shitom na ka bynta ka jingïaid shaphrang ha baroh ki liang,” la bynrap u Momin.
U la ïathuh ruh ba dang shen T.15,000 hajar klur la mang pisa na ka bynta ban shna ïa ka surok na Umroi sha Silchar na ka surok ar laiñ sha ka surok saw laiñ. Ka State BJP Unit ka khot bad wer ïa ki paidbah ka Meghalaya ban kyrshan ïa ki kyrtong ba la pynieng da ka party ha ka elekshon Lok Sabha ka ban sa long shne khnang ba ka jylla kan kham ïoh bun ki jingmyntoi da kaba phah arngut ki MP ka BJP ha kane ka kynti.
