Shillong, Lber 15: Kan long kaei kaei kaba ym ju kham jia koit ba ka tnat pule puthi jong ka sorkar jylla lyngba ka MBOSE la kynnoh ba ka la sam ïa ki kot jingkylli na ka bynta ki khynnah kiba la ïaleh ïa ka eksam matrik khamtam eh ha kane ka sngi kut, ba kan don ka jingsam ïa ki kot jingkylli kiba khlem wan da don ha ka kot pule jong ka Subjek Social Science.
Haba na ka liang ki lad pathai khubor kiba la ïoh ban ïakren bad ki katto katne ngut ki khynnah pule kiba ïaleh ïa ka eksam matrik ki la pynpaw ïa ka jingsngewsih kaba khraw bad kaba la pynlong ruh ïa ki ban ong ba ki sngew kum ban jaw ki ummat bad ktha ruh khlieh marsien shu ïohi, ba eh ki jingkylli ka social science.
Kane ka la wanjia ïa ki khynnah skul ba thoh eksam matrik mynta u snem 2024 kaba la kut ruh ha 15 tarik u Lber 2024 kaba dei ruh ka sngi kut thoh eksam, hadien ba ki la mih na ki kamra thoh eksam ki la ud ha kaba ïadei bad ka rukom set jingkylli ka MBOSE ki bym ïadei katkum na ka kot pule ba ki la pynkhreh bad kaba ki trei shitom baroh shisnem.
Katto katne ngut ki khynnah skul na ki skul bapher bapher kiba wan thoh eksam ha KJP Higher Secondary School, Shillong, ki la pynpaw ïa ki jingeh namar ka jingset jingkylli ka MBOSE ïa ka sobjek social science mynta u snem kam wan katkum na ki kot kiba ki la pynkhreh bad pule shitom.
Ki la ïathuh ruh ba kiwei kiwei ki sobjek watla ki la long kiba eh hynrei dang ki lah ban thoh ne thaw hi nalade hynrei ïa kane ka subjek social science kaba ki la thoh ha kane ka sngi kut kim lah satia ban thoh eiei ruh namar kim wan katkum na ki kot ba ki la pynkhreh bad pule.
Da kaba pynpaw ia ka jingsngewsih bad tieng artat ïoh kim lah ban poi sha ka thong ne kiba la angnud ban poi sha ki kyrdan kiba kham heh ne ha ki top position ne ha ka kyrdan kaba nyngkong katto katne ki khynnah ki la ong ba mar syn ïohi ïa ka kot jingkylli shwa ban thoh ïa ka eksam ki la ktha khlieh bad sngew kum ban ïam haba ïohi ïa ka rukom buh ïa ki jingkylli . “Ka la long ruh ka jinglehnohei ïa ka jingtreishitom jong ngi baroh shisnem, ban duh thiah duh dem ban pynkhreh bad ban pule ïa ka social science,” ïathuh ki khynnah skul haba ïakren sha ki lad pathai khubor.
Ha kaba adei bad kane ka jingeh na ka liang ki khynnah skul ki la kyrpad ïa ka MBOSE ba kan sngewbha ban ïarap kyrpang da kaba pynbeit thymmai biang bad lada long khamtam ha kane ka social science.
