Ka Congress ka don mynta ha ICU, ka UDP bad VPP kim poi shano shano ruh, jied ïa ka NPP: Sniawbhalang

Shillong, Lber 15 : U National General Secretary ka NPP bad Symbud Myntri Rangbah ka jylla u Ma Sniawbhalang Dhar, ula ong ba ka seng Congress ka dei party kaba don mynta ha Intensive Care Unit (ICU) bad kam don jingmyntoi ban jied biang ïa u kyrtong bad MP ba mynta u Ma Vincent H Pala na Shillong Parliamentary Seat.
Kumjuh ruh u la ong ba kam don jingmut ne jingmyntoi ban jied ïa u kyrtong ka Voice of the People Party (VPP) bad ka United Democratic Party (UDP) namar kine kim poi shano shano ruh namar la kut u pud u sam jongki tang ha Byrnihat.
Haba kren ha ka jingïalang kaba long ha Byrnihat, Ri-Bhoi ha ka sngi Palei, ban pan ka jingkyrshan ïa ka kyrtong ka NPP na Shillong Parliamentary Conostituency kaba dei ruh ka Myntri Sorkar ka Dr Ampareen Lyngdoh, u Ma Sniawbha ula ong ba kin don 4-5 ngut ki kyrtong, ki ban ïakhun ïa ka elekshon Lok Sabha na Shillong.
“Hynrei, u kyrtong ka UDP un nym poi shano shano ruh bad kumjuh u kyrtong ka VPP kumba phi ïatip, kine kin kut tang ha Byrnihat” ula ong. Ula ong ruh ba ki Nongthep vote, khamtam ki Garo bad ki bar jylla, kin ym jied satia ïa kine ki artylli ki party.
Haba kynnoh ba ka Congress ka dei ka jhad kaba la ngam jyllop, u Ma Sniawbha ula ong “Ka Congress ka dei ka party, kaba don mynta ha ICU bad ngam tip kaei ka ban jia ïa ka. Kane ka Party ba la rim duh hapoh ka Ri kala don satang 5 ngut ki MLA ha Meghalaya. Ka Party kaba ju synshar ïa ka Ri, kaba la jop shisien haduh 543 ngut ki MP hynrei kala don satang 40-50 ngut bad ha kane ka elekshon ban wan, ngam tharai ba kan tam wat ïa ka 40 seat ruh. Kumta, balei ngin phah biang ïa u MP ka congress. Lada ngi phah ïa ka Congress, ngi la ïakhun ïa ka thma kaba la rem lypa”.
“Na kata ka daw, nga kyrpad ïa ki paidbah ba ka lynti ïa mynta ka dei ïa phi ban vote ne jied ïa ka kyrtong ka NPP ka Dr Ampareen Lyngdoh” ula ong haba bynrap ba ki paidbah ki tip bha ban bishar ïa ka jingtreikam jong u Ma Vincent Pala ha kine ki 15 snem bala leit noh.
Ha kajuh ka por, u Ma Sniawbha ula pyntip ba kum u Myntri ka Tnad Transport, ula shimkhia ban ïakren bad ka Sorkar Pdeng ban mang pisa ha ka ban shna ïa ka surok 8 Lane na Khanapara sha Byrnihat bad ka surok 4-Lane na Umroi sha Ri-lum Jaintia khnang ban pynkylluid ïa ka jingïaid ki kali bad lait na ka jingdheng.
U Symbud Myntri Rangbah ula ai jingïaroh ruh ïa u MLA ka Jirang Bah Sosthenes Sohtun uba la trei shitom bha ban wanrah ïa ka roi ka par hapoh ka constituency. Ula ong ba une u MLA u ju ïa pyni nia wat bad u Myntri Rangbah manla ka janmiet ban ïoh ïa ki kam pynroi hapoh ka constituency.
“ Namar kane ka jingtrei shitom jongu ngi ïohi ba kane ka constituency kam shym la sahdien lada phai sha ka liang ki surok, ka umbam umdih, ka pule puthi bad kumta ter ter” ong u Ma Sniawbha da kaba ban biang “Ka Jirang bad ka Ranikor ki dei ki Constituency kiba ïoh bun eh ki kam pynroi pynpar na ka sorkar. U bah Sohtun u dei uwei na ki MLA uba shlur bad trei shitom bha nga lah ban ong namar u lah ban leit bud dien man la ka sngi ïa ki kam pynroi na u Myntri Rangbah”.
Ha kane ka jingïalang la ai jingkren ruh da u MLA ba rim ka Sohiong uba la ong ba ka NPP ka dei ka party kaba don ka nongrim bad ki nongïalam kiba biang kum u Myntri Rangbah u Conrad K Sangma, ki arngut ki Symbud Myntri Rangbah u bah Prestone Tynsong bad u Ma Sniawbha kumta u la kyntu ïa ki paidbah ba kin jied ïa ka kyrtong ka NPP ka Dr Ampareen Lyngdoh ha kane ka election MP Lok Sabha khnang ba ki kam pynroi kin nang ïai tuid sha ka jylla.
ïa kane ka jingïalang la pynïaid da u MLA ka Jirang bad la wan ïashimbynta da ki Nongïalam bad ki nongtrei jong ka party na kylleng ka them Ri-Bhoi.