Khliehriat, K’lyngkot, 01: Ka Laboratory ka ban peit bad pule ïa ki met bneng ne ka Astronomy Laboratory ha Ambrose Memorial Secondary School Khliehriat, East Jaiñtia Hills District kan dei ka banyngkong eh ha ka thaiñ Shatei Lammihngi.
Ïa kane ka Astronomy Laboratory la plie paidbah ha ka sngi Palei da u Myntri ka Sorkar Jylla Bah Kyrmen Shylla.
Ka jingpynkha jong ka skul ïa ka Astronomy Laboratory ka dei lyngba ka jingprat lynti jong u Deputy Commissioner ka East Jaiñtia Hills District Abhilash Baranwal.
Ka Ambrose Memoral Secondary School, Khliehriat ka dei kaba la seng da u MLA barim ka Khliehriat u Bah Justine Dkhar ha u snem 2000 bad mynta u dang bat kum u Principal jong ka skul kaba dei ruh kawei na ki skul kaba pawbha ha East Jaiñtia Hills District ban kyntiew ïa ka pule ka puthi ha ka distrik bad ha ka jylla.
Haba kren kum u kongsan, u Bah Kyrmen Shylla, u la ai ka jingïaroh kyrpang ïa u Deputy Commissioner uba la lah ban wanrah ïa kaba kum kane ka Laboratory ha kane ka skul ha East Jaiñtia Hills District.
“Ngi ïohi kiei kiei kiba thymmai hapoh ka distrik kiba wanrah jingmyntoi hapoh ka jingïalam jong u Abhilash Baranwal, kum ki Giant Screen ba la buh ha ki skul ki ban ïarap ïa ki khynnah ban pule da kaba ïohi ruh lyngba ka Screen ba la buh ka ki kamra klas,” u la ong.
U kren ruh halor ka jinglah jong u Baranwal ban pyntreikam ïa ka Monitoring System kaba khmih ïa ka jingwan poi ki nonghikai sha ki skul bad kane ka la ïarap shikatdei eh namar kiba bun ki nonghikai khamtam ha ki jaka ba kyndong hapoh ka jylla kim ju poi tikna sha ki skul hynrei ki shu phah hikai pateng ha kiwei da kaba siew bainong hynrei kane ka Monitoring System ka la ïarap ban tehlakam ïa kane.
U la pynpaw ruh ka jingsngew kmen halor ka jingïoh ïa kane ka Astronomy Laboratory ka ban ïarap shibun ïa ki khynnah khamtam kito kiba sngewtynnad ban pule ïa ka subject Science bad ong ruh ba lyngba kane ka Laboratory kan plielad ïa ki khynnah ban mihkhmat wat shabar ka jylla ha kiba bun ki rynsan ban pynpaw pyrthei ïa ka sap jingpule jong ki. U la ong ruh ba ki kmie ki kpa ki dei ki rishot kiba kyrshan ïa ki khun khamatam ha ki jingpule bad bunsien ki len ïalade ruh tang ban pynnang pynstad ïa ki khun.
Shuh shuh Shylla u la kitbok kitrwiang ïa ka Ambrose Memorial Secondary School ba kan nang kiew shaphrang ha ka jingshakri ban ai ïa ka jingnang jingstad sha ki khynnah kiba pule ha kane ka skul.
U Abhilash Baranwal haba ai jingkren u la ong ba kane ka dei tang ka jingsdang ka ban pynsngewtynnad bad pynshlur ïa ki khynnah ba kin sngewtynnad ban pule ïa ka subject Scienc namarba bun ki khynnah ha Meghalaya kim da sngewtynnad ïa ka subject Mathematic bad Science bad da ka jingdon kum kine ki Laboratory kan ïarap ba kin sngewtynnad ban pule.
U la ong ruh ba hapoh kane ka Laboratory lah ban leh bun jait ki Experiment bad kan ïarap shibun ïa ki khynnah ban mih shakhmat bad ban mihkhmat ruh shabar ka district bad shabar ka jylla ha ki rynsan bapher bapher.
U la kyntu ïa ki nonghikai khamtam kito kiba ladep ïoh ïa ki jinghikai ba kin sumar bha ïa ki tiar kiba don hapoh kane ka Laboratory namarba ki dei ki tiar kiba kham pher bad kiba jynjar ban bujli lada ki sniew. U la kyntu ruh ïa ki khynnah skul khamtam ki khynnah shynrang ba ki dei ban da leh bha ba ki tiar kin nym jot.
U la pynshai ruh ba kaba kum kane ka Laboratory ka la don ha ka jylla Assam bad Arunachal ruh bad kane kaba ha East Jaiñtia Hills District ka dei kaba nyngkong ha ka jinglah ban pynbit pynbiang ïa ka Laboratory.
U Babu Primus Dkhar bad u Babu Rinaldus Dkhar ki la ai khublei ïa u Deputy Commissioner uba la lah ban wanrah ïa kane ka Laboratory ha kane ka skul. Ha kajuh ka por u Babu Rinaldus Dkhar u la kyntu ïa u Deputy Commissioner ba un buh shuh shuh kum kine ki Laboratory sha ki skul kiba don sha ki thaiñ nongkyndong khnang ba kan ïarap ïa ki khynnah kiba pule ïa ka sobjek Science.
U la khot bad wer ruh ïa ki khynnah skul kiba na ki skul kiba mar jan ba ki lah ban wan sha kane ka Laboratory ban pyndonkam ïa kane ha ka por ba donkam.
Ka Kong Heimonmi Pasah kaba hikai ha kane ka skul ka la ong ba kane ka Laboratory kan ïarap shibun ïa ki khynnah ha ka jingpule jong ki ïa ka subject Science bad ha kane ka Laboratory lah ruh ban leh ïa kano kano ka project ban wad bniah (Research) bad ka don ka jingkyrmen ba kin sa don kin khynnah ki ban mih kum ki Scientist lyngba kane ka jingpule ïa ka sobjek Science.
Ha kane ka sngi la sakhi lang da ki nonghikai bad ki khynnah skul bad ki kmie ki kpa jong ki khynnah skul.
