Mawkyrwat, Ïaïong, 07: U bah Renikton Lyngdoh Tongkhar u MLA jong ka Mawkyrwat Constituency ha ka sngi balang jong ka taïew hadien ka jingplie ïa ka jingtei ba thymmai jong ka Phlangkynshi LP School u la leit ban jurip sa ïa ka ïing skul jong ka Phlangkynshi Upper Primary School kaba don ha shnong Phlang-kynshi, South West Khasi Hills District.
Kane ka jingleit jurip jong u MLA ka Mawkyrwat Constituency ïa ka Phlang-kynshi Upper Primary School ka long hadien ka jingpynsngew na ki nongpynïaid jong ka skul ba ki ïa kynduh bun ki jingeh la ka long ha kaba ïa dei bad ki jingpynbiang ïa ki jingdonkam jong ki kamra klas, ka madan kaba dang khoh-ruh khoh-ram bad kiwei de ki jingdonkam.
Namarkata, hadien ka jingjurip ïa ka ïing skul, u Bah Renikton Lyngdoh Tongkhar haba kren ha ki lad pathai khubor u la pynsngew ba halor kita ki jingeh ba ki nongpynïaid bad ki nonghikai jong ka Phlangkynshi Upper Primary School ki la pynpaw na ka liang jong u u la kular ba un sa leh ei ei da kaba un sa thaw ki lad ki lynti ban ïarap lyngba ki skhim na ka bynta kita ki jingdonkam jong ka skul khnang ba ki khynnah skul kiba don hapoh kane ka shnong kin ïoh ban bteng ïa ki jingpule ha ka rukom kaba biang.
