Ka Nongjri Parish ka shlem saiñdur ba paka ha ka thaiñ Nongtrai sepngi

0

Nongstoiñ, Ïaïong, 7: Ka shnong Nongjri kaba hap ha Mawshynrut Civil Sub Division kumba 19 kilomitar ei ei na Riangdo kaba don ha rud ka surok Riangdo-Bamil, ka la don ka Secondary School ba la seng da ka Balang Katholik naduh ki snem ba mynshuwa, kaba la ïoh ruh mynta la ka jong ka Parish ha kaba u Rev Fr Stephan Lamin u dei u Parish Priest jong katei ka thaiñ.
Ha ka jingleit jurip jong u nongthoh khubor ïa katei ka thaiñ, la ïoh ban ïakren bad u Rev Fr.Lamin u ba la ïathuh ba ha ka por ba dang sdang ban seng ïa katei ka Mission skul ha katei ka shnong, ka long kaba eh haduh katta katta namar ka dang dei ka shnong kaba kyndong bha bad ka bym pat don surok kali. Nalor kata ka dei ka thaiñ kaba dap da ki khlaw ki btap hynrei da ka jingisnei jong u Blei, suki suki ki nongshong shnong ki la nang sngewthuh bad ki la sdang ban ñiewkor ïa ka jingpule.
U la ong ruh ba ha kine ki sngi ka skul ka la kiew sted bha bad ka jingdon jong ki khynnah skul ka la poi palat hynriew spah ngut. U la ong ruh ba naduh ba u la wan shimti kum u Parish Priest ha katei ka jaka, u la pyrshang katba kot la ka bor ban pynsngewthuh ïa ki paitbah ha ka thaiñ kumno ba kin nang ïa ka burom ka akor, ban im tip briew tip blei bad ban ïalong shitylli ha baroh ki liang, la ka long ha ka synshar shnong kam thaw ban ñiewkor ïa ka mariang bad ïa ki sawdong sawkun ha ryngkat ka jingleh khuid.
U Rev Fr Lamin u la ong ruh ba na ka liang ka Parish ka la shimkhia ruh ha kaban pynsngewthuh ïa ki paitbah nongshong shnong, ba kin ïaleh katba lah ban pynneh pynsah ïa ka riti ka dustur ba la ïalam da ki long shuwa. Ha kajuh ka por u la ong ba na ka bynta ki khynnah skul, ka Mission ka la pynbiang ïa ki Hostel na ka bynta ki shynrang bad kynthei nangta ki kamra bam bad kiwei kiwei.
U la ong ruh ba na ka bynta ban kyntiew ïa ki kam ïalehkai sport, ka Parish ka la dep shna ïa ka Basket Ball Court na ka bynta ki khynnah skul. Na ka bynta kiwei pat ki jingïalehkai kum ka phutbol bad kiwei kiwei, u la ong ba ha ki snem ba la dep, namar ka jingtrei kam jong ka jingkhang dam, bun ki jait jingïalehkai kum ka phutbol, siat khnam bad kiwei kiwei la hap ban pynsangeh noh. Hynrei, ha une u snem na ka liang ka Parish ka lah ban sdang biang na ka bynta ban kyntiew ïa ka sap ka phong jong ki khynnah ha ka thaiñ baroh kawei.

Leave A Reply

Your email address will not be published.