Jurip u Amit Shah ha khappud Siliguri, plie bad buh mawnongrim ïa ki projek BSF ba kot 77 klur
Siliguri, Naitung 18 : U Myntri ka tnat Kam Pohïing ka Sorkar Pdeng, u Amit Shah, ha ka sngi Saitjaiñ u la jurip ïa ka rukom j ïada ha ki khappud ha ka thaiñ North Bengal bad u la plie paidbah bad buh mawnongrim ruh ïa ki projek jong ka Border Security Force (BSF) kiba kot haduh 77.06 klur.
Ha kane ka jingleit, u Myntri Kampohïing u la peit bniah ïa ki kor jingïada ba la shna ha India bad ki kor technology kiba thymmai tam, kynthup ïa ka radio-based fence breach detection system, kaba lah ban ai jingmaham mardor sha ki shipai da kaba pynsawa ïa ka khubor ba la buh lypa lada don ba ktah ne pynjulor ïa ka jingker khappud.
U la buh ruh ïa u mawnongrim na ka bynta lai tylli ki projek BSF ba kot T.47 klur, bad na ka bynta ka jingtei ïa ka jingker khappud kaba jrong 4 kilometre ha ka jinglut kaba kot T.30 klur, ha ki jaka ba dang shu thied thymmai na ka bynta ar tylli ki Border Outpost ha West Bengal. Ïa kane u la leh lyngba ka virtual mode.
Hashuwa kane, u Amit Shah u la leit sha ka Seema Chowki jong ka 18th Battalion BSF ha Jumagachh, Fulbari Border Outpost, hajan Siliguri, ha kaba u la ïakren bad ki shipai BSF, kiew sha ka watch tower ban jurip ïa ka khappud bad shim bynta ruh ha ka jingthung dieng.
U Myntri, uba la poi ha Bagdogra ha ka janmiet jong ka sngi Thohdieng ha ka jingleit jngoh kaba lai sngi sha West Bengal, u la shim bynta ruh ha ka Prahari Sammelan jong ka BSF bad ïakren bad ki shipai. La synran ïa u da u Myntri Rangbah ka ka jylla, u Suvendu Adhikari.
Ki heh ophisar ka sorkar jylla bad ki bor pahara, kynthup ïa u Chief Secretary Manoj Kumar Agarwal, Home Secretary Sanghamitra Ghosh, Director General ka BSF Praveen Kumar, Director General ka NIA Rakesh Agarwal, Director General of Police ka jylla Siddh Nath Gupta, North Bengal IG Sukesh Jain, bad u Joint Director jong ka Intelligence Bureau, ki la donlang ha kane ka jingïalang.
Ka Ministry ka la ong ruh ba u Shah u la jurip ïa ka infrared alarm system kaba la pyndonkam ha ki jaka ba eh ban pahara, kum ha ki wah, bad ki bynta ba don jingïakynduh ha ka jingker khappud. Kane ka kor ka lah ban ai jingmaham lypa lada don ba pynthut ïa ki infrared beam. U la peit ruh ïa ka gate management system, kaba pynsuk ïa ka jingïaid jingïeng jong ki nongshong shnong bad ki nongrep ha khappud India-Bangladesh.
Haba ai jingkren, u Amit Shah u la ong ba hapoh ka jingïalam jong u Myntri Rangbahduh Narendra Modi, ka sorkar pdeng ka la kut jingmut ban pynskhem bad pynneh ïa ki khappud jong ka ri.
la ong ba ka sorkar Modi ka dang tei ïa ka quadrangular security grid ban pynkhlaiñ ïa ka jingïada khappud, bad ba ka bha ka miat jong ki shipai pahara khappud bad ki longïing jong ki ka long ka hakhmat eh jong ka sorkar.
“Ngim dei tang ban pynskhem ïa ki khappud, hynrei ngi trei ruh ban pynduh ïa ka jingwan tuh rung sha ka ri da kaba pyntreikam ïa ka jingmut ‘Smart Borders’,” u la ong.
Ka jingleit jurip jong u Shah ka long kaba kongsan bha ha kaba ïadei bad ka jingïada ïa ka Siliguri Corridor lane ka ‘Chicken’s Neck’, kaba long ka surok kaba jrong tang kumba 17 haduh 22 kilometre, bad kaba dei tang ma ka ka lynti ba pyniasoh hapdeng ka ri India bad ki phra jylla ka thaiñ Shatei Lam Mihngi.