SHILLONG, Nailur 27: Ka Smit SC ryngkat bad ka Laitkyrhong SC ki la khur jingjop ha ki jingïalehkai ka lympung Second Division 2024 jong ka Shillong Sports Association ba la long ha ka Sngi Thohdieng (27 tarik Nailur 2024) ha madan SSA Stadium, Polo.
Ha ka jingïakhun kaba nyngkong, ka Smit SC ka la pynliem noh ïa ka Imson SC da 3-1 kol. Ka Smit SC ka la ïoh ban lamkhmat lypa ïa ka jingïalehkai ha ka kylla step lyngba ki ar kol na u Nathaniel Kharbangar (16 bad 41 minit).
Na ka liang jong ka Imson SC ka la ïakhun shitom bad ïoh pynphai shi kol ha ka 66 minit lyngba u Amosly Nongbri, hynrei ka la duh mynsiem biang hadien ba u Nangsan Warlarpih u la pynkhih ïa ka kol kaba lai na bynta ka Smit ha ka 77 minit ban pynthikna ïaka namjop.
Ha ka jingïalehkai kaba bud, ka Laitkyrhong SC ka la salit da shi kol ïa ka Umphrup SC, bad ïa kane ka shi kol la thep da u Samboklang Kurkalang ha ka 71 minit jong ka kylla miet.
