Jowai, Naitung 05: Ka lympung ïalehkai 3rd U Adelbert Laloo Memorial Trophy jong ka kyrdan 3rd Division Football Tournament 2023, ba la pynïaid da ka West Jaiñtia District Sports Association (WJDSA) kaba la long mynta ka sngi Balang ha madan Kiang Nangbah Stadium, Dongmihsngi Jowai.
Haba phai sha ka jingïakhun kaba nyngkong ka Newhills kala pynliem da 3-0 kol ïa ka Khliehshnong Ialong, ïa kitei ki kol na ka Newhills la thep da u Hamedamanbha Thma haka minit ba 2, u Samson Swer ha ka minit ba 20 bad u Damehipaia Niangti haka minit ba 70+3.
Ha ka jingïakhun kaba ar ka Mookaswan Dongneiñ kala pynliem da shikol 1-0 ïa ka Salaroh, ïa kane ka kol na ka Mookaswan Dongneiñ la thep da u June Shylla haka minit ba 14.
Ka jingïakhun kaba lai ka kynhun ïalehkai jong ka Myrjai kala pynliem 1-0 kol ïa ka Chyrmang Wah, ha kaba ïa katei ka kol na ka Myrjai la thep da u Lamphrang Kyndait haka minit ba 7.
Katba ha ka jingïakhun kaba saw ka Pammanik kala pynliem da 2-1 kol ïa ka Riatsaliya Mihmyntdu, ïa ki kol na ka Pammanik la thep da u Emlang Pakma haka minit ba 17 bad u Dami Talang ha ka minit ba 40, na ka liang ka Riatsaliya Mihmyntdu shikol la thep da u Monlangki Chyrmang haka minit ba 6.
