Jop ka Lagaan 2.0 bad ka FSB ha ka SCA Third Division 2024-25

Shillong, Kyllalyngkot 12: Ki jingïalehkai ka lympung Shillong Cricket League ha ka kyrdan Third Division 2024-25 jong ka Shillong Cricket Association ba la long hynne ka sngi U Blei.
Ka jingïalehkai ba nyngkong la sakhi ïa ka Lagaan 2.0 kaba la jop kput haduh 104 ron ïa ka Solidarity Club.
Watla ka Solidarity Club ka la jop ïa ka toss bad jied ban bol nyngkong hynrei kam shym la lah pat ban tehlakam ïa ka Lagaan 2.0 ba kan kamai haduh 208 ron naki 20 over ba la mang bad hap 9 wiket. Ki nongtied kiba la kamai bun ron ki long u Anuj Kumar (53 ron naki 27 bol) bad u Subhas Kumar (29 ron naki 29 bol).
U Deepak Mahato (4 over: shah tied 24 ron: khur 3 wiket) bad u Raju Chettri (4 over: shah tied 40 ron: khur 2 wiket) ki la long kiba seisoh tam ha ka bol.
Haba pyrshang beh ïa ka thong, ka Solidarity Club ka la lah ban kynjoh tang 104 ron bad shah pynhap baroh 10 wiket hapoh 13.4 over bad mad ïa ka namrem da 104 ron.
U Aniket Kumar u la khur 2 wiket naki 2 over bad shah tied 13 ron, hynrei ka namtam ka long sha u Anuj Kumar u la khur 3 wiket naki 3.4 over bad shah tied tang 21 ron ban khur syndon ïa ka nam ‘Player of the match’.
Ha kawei pat ka jingïalehkai hapdeng ka FSB pyrshah ïa ka Super Challengers. Ka Super challengers ka la jied ban bol nyngkong hadien ba jop ïa ka toss. Haba shimti ban tied nyngkong ka fsb ka la kamai 113 ron bad hap baroh 10 wiket naki 17.3 over.
U Prashenjit Chanda (27 ron naki 36 bol) bad u Debojit Phukan (18 ron naki 10 bol) ki dei kiba la kamai bun ron ïa ka kynhun.
Ha ka bol u Vishal kumar u la khur 4 wiket naki 4 over bad shah tied tang 24 ron, katba u Arun sewa u la khur 1 wiket naki 4 over bad shah tied 21 ron.
Haba pyrshang jubab ka Super challengers ka la shah khanglad noh da tang 95 ron naba shah pynhap baroh 10 wiket tang hapoh 14.4 over ban mad ïa ka namrem da 18 ron.
U Sangram Bhattacharjee u la khur 3 wiket naki 4 over bad shah tied tang 9 ron ban khur syndon ïa ka khusnam Player of the match.