Shillong, Lber 23 : Ka West Jaintia Hills District Cricket Association bad ka East Khasi Hills Cricket Association ki la khur jingjop ha ki jingïalehkai ha ka U-14 Girls Inter District Cricket T20 Tournament 2023 ha ki jingïalehkai ha Nongstoiñ ha ka sngi Palei.
Ka WJH ka la jop salit ha ka jingïakhun pyrshah ïa ka West Khasi Hills DCA, da kaba pynliem da khyndai ron. Ka WJH kaba la tied nyngkong, ka la kamai 146 ron duh noh 8 wicket ha baroh ki 20 over, ka Anastesia S Shullai kadei ka thei tied kaba kamai bun ron da 41 ron bad ka Sawakahi Syngkon ka kamai 19 ron. Ka WJH ha ka jingkamai ba 92 ron duh noh 2, hynrei ka Adelia Fedelia Lyngkhoi ka khur 2 wicket ai kamai 13 ron.
Ka Adelia Fedelia Lyngkhoi kadei ka thei tied kaba la lah ban ïalehkai bha ha ka jingkamai ron, da kaba kamai 43 ron (not out). Phewse, ka Syngkon kaba ïoh khur 4 wicket ai kamai 10 ron bad ka Alvarine S Shullai 2 wicket ai kamai 28 ron, ka la khanglad ïa ka WKH kaba kamai tang 137 ron duh noh 7 wicket. Ka Syngkon ka la ïoh ïa ka nam Player of the Match.
Ha kawei pat ka jingïalehkai, ka Shillong Cricket Association ka la tied nyngkong bad ka la shah pynhap lut baroh ki wicket da kaba kamai 86 ron ha ki 16.4 over. Lai ngut ki thei ïalehkai kiba kamai ron hynrei dei tang Leeny Raika kaba ïoh ban kamai 15 ron. Ka Habandarisha Shangpliang ka khur 3 wicket ai kamai 29 ron, ka Lawaijanai Synnah ka ïoh 2 wicket ai kamai 14 ron bad ka Eliza Lyngdoh ka ïoh 2 wicket ai kamai 28 ron.
Ka EKH ka khlem da pynslem haba beh ïa katei ka thong, ka la lah ban pyndep bad sah sa phra over. Ka Sharaisuk Marpna kadei ka thei ïalehkai ba kamai bun ron da 26 ron (not out). Ka Habandarisha Shangpliang ka la ïoh khur ïa ka nam Player of the Match.
