Ka Dorbar Mangtyngka jong ka Ïing Dorbar Thawaiñ kaba nyngkong eh ha kane ka sorkar ba thymmai ka la sakhi ïa ka jingshim bynta ryntih jong ki MLA kiba dang shu jop thymmai na ki party bapher bapher kynthup la ka jong na ka liang Pyrshah ne wat na ka Liang Synshar ruh. Lada phai shwa tang na ki MLA ba don ha ka Liang Pyrshah, na ki san ngut kiba jop na ka Congress arngut ki dei kiba dang jop nyngkong kata u Bah Charles Marngar na Mawhati bad u Bah Gabriel Wahlang na Nongstoin. Kitei baroh arngut ki la pyni ïa ka jingshlur bad ka jingtbit jong ki ban ïasaid ha Ïing Dorbar nalor ba ki la don lypa ka jingtbit kum ki MDC ha Ïing Dorbar jong ka Khasi Hills Autonomous District Council.
Lada phai pat sha ka Trinamool Congress kane ka party ruh kaba jop san ngut ka don arngut kiba jop thymmai, kine ki kynthup ïa u Rupa M Marak na Dadenggre bad u Mizanur Rahman Kazi na Rajabala constituency. Ka Voice of the People’s Party ruh kadei sa kawei pat ka party kaba na ki saw ngut kiba jop ha kane ka elekshon MLA ar ngut ki dei ki dur khmat thymmai katba arngut ba kynthup ïa u Bah Ardent Miller Basaïawmoit MLA ka Nongkrem bad u Bah Adelbert Nongrum na North Shillong ki dei kiba la jop teng ha ki samoi ba la dep. Ki MLA ba jop thymmai na ka VPP ki kynthup ïa u Bah Brightstar Marbaniang na Mawlai bad u dei ruh u MLA ba jop bun tam ha kane ka elekshon ba la dep katba uwei pat u dei u MLA na Mawryngkneng, Bah HS Kharpran.
Ki don kiwei pat ki MLA na ka Liang Synshar kum na ka HSPDP kiba baroh arngut ki la dei kiba dang jop thymmai kata u Myntri ka tnad Sports Bah Shakliar Warjri ba jop na Mawthadraishan bad u Bah Methodius Dkhar ba jop na Mawshynrut constituency katba na ka UDP pat ki kynthup ïa u Bah Oland Suin na Mawsynram bad Bah Mathew Beyondstar Kurbah na Mawphlang. Kham bun hi na kitei ki MLA ba thymmai ki dei na ka party NPP bad bun na kitei ki dei na rilum Garo namar ha kane ka samoi na ki 24 seat ka NPP ka la jop haduh 18 tylli katba ïa ki 6 tylli ki constituency la ïa sam hapdeng ka AITC kaba ïoh saw ngut, Congress marwei bad kyrtong shimet marwei.
La ïohi ruh ba kitei ki MLA ba dang jop thymmai tang mar ïa sdang ka Dorbar ki la ïa ieng ban kren na ka bynta kiba bun ki ishu kiba ïadei bad ka constituency bad khamtam wat na ka bynta ka ishu kaba ktah ïa ka Jaidbynriew kumjuh ïa ka Jylla baroh kawei. Kaba kham i shngain ka long ruh ba kane ka Dorbar mynta ka don ym tang ïa ka Liang Synshar kaba khlain kaba don ïa ki Myntri kiba la kham shemphang bad kiba la jop bunsien hynrei ka don ruh ïa ka Liang Pyrshah kaba tbit. Kumba ka long mynta hi, ka jingdon naduh u Bah Prestone Tynsong, Bah Paul Lyngdoh, Kong Ampareen Lyngdoh, Bah AL Hek, Bah Sniawbhalang Dhar bad kiwei kiwei ka la pynsting haduh katta katta ïa ka jingkit ba khia jong u Myntri Rangbah ka jylla, Conrad K Sangma.
Hynrei lada phai pat ha kawei ka liang, ka Liang Pyrshah lei lei ka kham khlain namar ka don ïa ki radbah kiba tbit bad shemphang bha ban ïatai kynthup naduh u Bah Charles Pyngrope, Dr. Mukul Sangma, Bah Ronnie V Lyngdoh, Bah Ardent Miller Basaïawmoit, Saleng A Sangma nalor kiwei pat ki MLA ba dang jop thymmai. La khmih lynti ruh ba ki nongshong shnong ka jylla kin ïohi shuh shuh ïa ka jingtbit jong kine ki nongmihkhmat ba thymmai ban ïatai ha Dorbar nangne shakhmat.
