‘Jingshai na Ephphatha’ ka kren shaphang jingdonkam ka jingnang jingstad ïa kiba duna dkhotmet

Khliehriat, Naitung, 28: Ha shwa ba ngin poi sha ka bynta kaba kren shaphang ka jingdonkam ka jingnang jingstad ïa ki briew kiba don jingduna ha ki dkhot met, khyndiat ngin phai sha ka Ephphatha Society. Kane ka Ephphatha Society ka dei ka kynhun treimon sngewbha kaba la khie lung bha ha East Jaiñtia Hills District bad ka dei ka kynhun kaba khmih kyrpang ïa kito ki briew kiba don jingduna ha ki dkhotmet, la seng bad saiñdur ïa kane ka Society ha ka 2 tarik u bnai nohprah 2020, ym lah ban len ba kane ka Society kaba la lam khmat da u Director, u E . Sapuh, u Secretary, u bah Shaniah Phawa, lem bad ki dkhot, ka la lah ban leh shibun ki kam kiba radbah ha ka imlang ka sahlang na ka bynta ki briew kiba don jingduna ha ki dkhotmet kiba dei ki nongshong shnong ba kyrpang jong ka ri.
Haba kren shaphang ka jingdonkam ka jingnag jingstad, kaba katkum ka jingthoh ba la sot na ka kot ‘Jingshai na Ephphatha’ la ong ba “Ka jingnang jingstad ka long kaba donkam haduh katta katta ha ka jingim jong u/ka wei pa u wei , namar ka jingstad ka long ka spah kaba ïai im lynter bad u briew haduh ka sngi ka jingiap ha kaba u nongtuh um lah ban tuh, ka sarang kam lah ban pynsniew.
Ka jingnang jingstad kam shym mut tang ïa kiba riewspah ne kiba biang ka met ka phad, kiba koit kiba khiah, hynrei ka long solonsar lang ïa baroh kynthup kyrpang ïa kito ki khynnah kiba don jingduna ha ki dkhot met, ka jingkhim mynsiem, ka jingtlot ha ka bor pyrkhat ne na ki daw kiba bun, ki ju pynlong ïa ki kmie ki kpa jong kito ki khynnah kiba don jingduna ha ki dkhot met ban pyrkhat ba ka jingnang jingstad kam donkam than ïa ki khun jong ki, hynrei ha kane ka juk shai ba ngi im mynta ngi dei ban long ki nong ai mynsiem ïa ki ban pynshlur ïa ki ban leit skul namar ma ki ruh ki long kiwei na kita kiba don ka hok ban ioh ïa ka jingnang jingstad kumba long lem kiwei pat ki khynnah kiba koit ba khiah.
Ban pynïoh ne pynurlong ïa ka hok jong kine ki khynnah, ka jingiatreilang ban ïa sngewthuhjingmut hapdeng ki kmie ki kpa, ki jaka pule, ka shnong ka thaw lem bad ki bor sorkar ba dei peit ïa ka tnat pule puthi ka long kaba dnkam haduh katta katta, khnang ba ka jingnang jingstad jong kito kiba don jingduna ha ki dkhot met hapoh ka jylla khamtam ha ri lum khasi bad Jaiñtia jong ngi kan long kaba kiew irat na uwei u snem sha uwei pat.
Hapdeng ka jingduh jingkyrmen bad u lyoh uba dum uba wan kah dum, la wan mih ka Ephphatha Society kum ka jingkyrmen bad ka jingshai hapdeng kiba bun bah ki kmie ki kpa, hooid watla ka Ephpharha Society ka long kaba dang lung ha ki snem hynrei ka long pat kaba iohi jngai ïa la ka kam bad ka lyngka treikam lyngba ki nongïalam bad ki dkhot jong ka bad shisien ka sngi kan sa lah ban pynurlong ïa ka jingthmu ba janai jong ka Society bad kata ka long ban seng ïa ka skul kaba kyrpang, ban buh ïa ki jaka hikai ba kyrpang bad ruh ban pynioh ïa ka hok bad jingiarap sha baroh ki khun jong ka district bad shabar ruh kumjuh.
Katkum ka jinglap jong ka Ephphatha Society, la lap ba ha ri lum Jaiñtia ki don tang 4-6 tylli ki jaka pule kiba long kyrpang na ka bynta kito ki khynnah kiba don jingduna ha ki dkhot met, kata ka dei ka Bethani Society, Dwar Jingkyrmen, Jyoti Sroat, Fernando Speech and Hearing bad kiwei kiwei bad la shem ruh ba ki don tang khyndiat eh ki seng treimon sngewbha (Society) ha ri lum Khasi bad Jaiñtia kiba long la kloi ban iarap ïa kiba kum kine ki khynnah , kita ki kynthup ka Ephphatha Society, ka St Francis Orphanage, Society for the Welfare of disable, St Edmund Campus, Dwar Jingkyrmen School in need for special education, Mary Rice Centre for special Social welfare bad kiwei kiwei.
Ka East Jaiñtia Hills District ka dei kawei na ki district kaba dang thymmai hapoh ka jylla bad kaba dang sah dien ha baroh ki liang khamtam ha ka pule puthi kata lada ïanujor bad kiwei ki district, ka don tang kawei ka skul secondary sorkar (Government Secondary School) lai tylli ki Defecit Secondary School bad katto katne ki Government Aided School bad ki Adhock Aided Grant Primary School bad ki skul SSA ha man la ki shnong, ka jingdon ki skul sorkar (Lower Primary School) bad ki skul SSA ki iarap ban pynkha roi ïa ka jingnang jingstad sha ki thaiñ nongkyndong, hynrei ka jingjot rathai ki skul, ki paiñkhana bad ka jingkhapngiah bad ka jingbym tikna ki nonghikai, kumjuh ruh ka jingbym lah kot bor shuh ki nonghikai ka pynlong pat ka jinghiar dor ha ka pule puthi, dei lyngba kine ki jinglap bad jingshem kiba la nang pyn troiñ shuh shuh ïa ka jingpyrkhat jong ki kmie ki kpa jong kito ki khynnah kiba don jingduna ha ki dkhot met ha kaba kim long kiba shlan ban phah skul ïa ki khun.
Ka jingbym don ka Special School lane ki skul kiba kyrpang na ka bynta ki khynnah kiba don jingduna ha ki dkhot met hapoh ka district ka wanrah jingeh bad jingkutlad bad bym lah kot bor jong ki kmie ki kpa ban phah skul ïa la ki jong ki khun shabar ka district, ka jingduna ka jingïarap bad jingkyrshan na ka liang ka sorkar, ki shnong ki thaw, ka imlang ka sahlang bad ki seng treimon sngewbha ka wanrah ïa ka jingpep skul noh shiteng por jong kiba bun ki khynnah kiba don jingduna ha ki dkhot met.
Katkum ba long ha ri lum Khasi bad Jaiñtia, 70 percent lah ban ong ba ki khynnah kiba don jingduna ha ki dkhot met kiba don ha ki skul ki dei ki khun kiba wan na ki longïing ba ïoh ba kot katba 20 percent pat ki dei kito kiba na ki longïing ba duk bad tang 10 percent pat kiba ioh jingkyrshan na kiwei ki lad jingiarap, niar eh ban shem ia ki khynnah kiba don jingduna ha ki dkhot met ha ki skul sorkar lait noh ha ki katto katne ki skul SSA, hynrei kiba kham bun ki don bad ki shlem pule ha ki skul shimet, ne ki skul ba pyniaid da ki shnong, ki Balang, ki Society namar ki kham lait na ka jing ïa shnong khapngiah ha ka por ba shong klas, kham suk ka leit ka wan, kham ioh ïa ka jinghikai ba tikna bad kiwei kiwei de.