Ka Mendipathar, ka la khraw nam jubor ha kine ki sngi, namar ka la ïoh ïa ka lynti rel bad mynta kan ïoh sa ka karkhana shna umsoh Pepsi, kaba shongdor kumba T.200 klur bad kane ka karkhana, kan ai kam ïa kumba 500ngut ki samla trai shnong jong katei ka thaiñ.
Ka dei ka jingtrei kaba radbah bad ka ïahab shisha ban ai burom ïa U Conrad Sangma, Myntri Rangbah ka jylla bad u nongïalam na Garo hills, ba u poi shat jingmut ban plie ïa ka karkhana, kaba lah ban ai kam ïa 500 ngut ki khun samla bad kaba lah ban ai bam ïa kumba 1,500 ne 2,000 ngut ki khun ki tnga jong kitei ki nongtrei.
Sniewbok ba ha Ri Khasi jong ngi, kim don satia kitei ki kompeni, kiba wan, da ka jingmut ban ai kam ïa ki samla, hynrei lada ngi peit ïa ki karkhana ha East Jaiñtia hills, ha Byrnihat, ha Umïam bad kiwei kiba don da ki spah tylli, ki dei kiba wan tang ban ïoh ïa ka subsidy na ka sorkar, ki wan ban ïoh bam ei ka bai ding ilektrik, ki wan ban wan rah ïa ki briew lajong bad kiba khlem don labour license bad kam dei tang katta, hynrei ka kompeni Pepsi, ka la ïateh ba ïa utei u jingdih, kan die ha Meghalaya, katba ki kompeni dewbilat kiba don ha Ri Khasi Jaiñtia, ki don tang ïa ki karkhana ban shna dewbilat, katba ka jaka pynïaid ïew ka dei sha Assam bad kumta ka dor jong ka dewbilat, ka tad bha ha Assam, ban ïa kaba die ha Ri Khasi.
Ka sorkar jylla, ka la thaw ïa kawei ka aiñ, kaba la tip, kum ka Meghalaya Industrial and Investment Promotion Policy (MIIPP) 2024 bad ka la dei namarkata, ba kan pynrung lang noh ïa baroh ki karkhana kiba don ha ka jylla, da katei ka aiñ bad ban bthah, ba ki dei ban ai kam haduh 90 percent ïa ki trai shnong, kumba ki la leh ïa ka karkhana Pepsi bad ïa kito kiba pyneh, ki la dei ban beh noh.
Ka wan sa kawei ka mat bad kata ka long, la ka jingwan ki karkhana sha Garo hills, ka dei namar ba ka don ka lynti rel ne ïoh lehse, ba ka kham suk ban ïoh ïa ka jaka katba ki donkam, hynrei khlem pep, ka jingdon ka lynti rel, ka la dei lypa, ka kabu ksiar, ba kan suk ka leit ka wan, ka kit ka bah bad ha ka dor kaba tad shibun, namar ba ïa ka mar kaba wan kit da ka trok bad kaba wan pynpoi da ka rel, ka jing ïapher ka bai kit ka long ka bym lah shuh ban ïa nujor.
Ngim tip shuh ïa ka jingmut kaba don sha lyndet jong ki Nongïalam saiñ pyrthei, namar ba haba ïadei bad ka jingtih pynjot ïa ka mariang, la shah sngewbha ïa kitei ki karkhana, ba kin wan sha Ribhoi, sha Jaiñtia hills, sha West Khasi hills; katba ïa ka karkhana shna umsoh, kaba plie lad ïa ka rep ka riang, kaba pynshlur ban pynmih shibun u soh u pai, la leit rah sha Garo hills bad katei ka dei sa kawei pat ka bynta kaba dei ban ïashai bha.
La ïohi ruh ba ha kine ki sngi ki Myntri ka Sorkar jylla kiba dei na Khasi Jaiñtia kim ju don ktien eiei ban kren halor ka jingdonkam ka roi ka san ha kane ka thaiñ Khasi Jaiñtia watla kadei kaba bun paid, katba u Myntri Rangbah ka jylla pat u la nangbun kam manla ka sngi ban leit plie ïa kiba bun ki Projek ha thaiñ Garo hills.
Kane ka jingkynthoh kam mut satia ba isih ne ibeiñ ïa ki jaitbynriew Garo hynrei ka jingsneng ïa ki Myntri sorkar ka Khasi Jaiñtia Hills kiba long barabor tang ki maw shaiñ doh jong kane ka sorkar.
Haba kynthoh kumne kam mut ruh ba kynnoh ïa baroh ki MLA ka Khasi Jaiñtia hynrei ki don pat ki Myntri kiba kwah beit ban ïada ïa ka jingleh ka sorkar bad ban khanglad ïa ki kam jong ki katto katne ki sengbhalang kiba kwah ban pynbha bad ïada ïa kane ka ri bad ka jaitbynriew Khasi Jaiñtia kaba kyrpang.
Lah ruh ban pynkynmaw ba ki don ki Myntri sorkar kiba hakhmat eh kiba shu pynlong kam Kai ruh wat ïa ka kam them metor kaba la shim por bha ban pynkynriah bad ba la rai ka Ïingkashari.
Ka por ka ladei ba ki nongshong shnong khasi Jaiñtia ki ladei ban ai jingsneng ïa kum kine ki nongmihkhmat ki bym ler kam shuh bad kiba lah luiñ ki reng.
