Shillong, Naitung 28: Ka Nongstoin District Sports Association bad ka Ri-Bhoi District Sports Association ki la jop pura baroh ki jingïalehkai ha ka wat ïakhun ba ar (Round 2) jong ka Meghalaya Youth League 2024, bad pynjlan ïa ka lynti da ka namjop ha baroh ar kyrdan, U-14 bad U-16 da ka namjop ha ka Sngi Saitjaiñ.
Ka Ri-Bhoi ka la pynliem kput ïa ka Riwar Mihngi Football Association haduh 9-0 kol ha ka kyrdan U-14, bad da 6-0 kol ha ka kyrdan ïalehkai U-16 na ka thup kynhun ka Zone C ba la pynïalehkai ha madan UUP Stadium, ha Pynursla. La sakhi ruh ïa u Ribanshan Kyrsian u ba la khyrwit hat-trick na bynta ka Ri-Bhoi ha ka jingïalehkai U-14.
Ha kawei pat ka liang, ka Nongstoin, kaba pdiang mynta la ar sien ban pynlong jingïakhun, ka la pynliem noh ïa ka Mawkyrwat District Sports Association da 3-0 kol ha ka Under-14 bad da 2-0 kol ha ka U-16 na ka thup kynhun ka Zone D.
Hadien ba ki la jop ha baroh ki jingïalehkai ka taïew ba ladep, baroh ar, ka Nongstoin bad ka Ri-Bhoi ki la ïoh ban khur pura 6 point ha baroh ar tylli ki kyrdan.
Nangta ka kynhun ïalehkai kyrdan U-14 jong ka Pyndengumiong District Sports Association ruh ka la ïoh ban kyntiew 6 point hadien ba lah pynliem ïa ka Tyrsad Area Sports Association da 2-0 (na ka Zone D) hynnin ka Sngi Saitjaiñ. Katba ka long khongpong ïa ka kynhun U-16 jong ka Pyndengumiong, naba ka la shah rem noh da 4-0 kol ha ka Tyrsad.
Ka jingïalehkai U-16 na ka thup kynhun Zone A ka la sdang hynnin ka taïew, ha kaba ka Williamnagar District Sports Association ka la jop suk da 6-2 kol ïa ka Tura District Football Association, bad ka nam ka long sha u Vrickan N Sangma u ba la khyrwit hat trick ba nyngkong ha ka kyrdan ïalehkai U-16.
Ha ka Zone A kyrdan U-14, ka jingïalehkai ka la long hapdeng ka North Garo Hills District Sports Association bad ka Baghmara District Football Association, bad la sakhi ïa u Negsim Ch Momin u ba la thep haduh saw kol kaba la ïarap ïa ka North Garo Hills ban jop suk da 7-0 kol.
Ha ka Zone B, la sakhi ïa ka West Jaintia District Sports Association kaba ïakhun ïa ka sien ba nyngkong ha ka U-14 bad jop da 5-1 kol, nangta ka kynhun U-16 ka la jop da 1-0 kol pyrshah ïa ka East Jaintia District Football Association ba la pynlong ha madan Kiang Nangbah Stadium, Jowai.
Ka Laskein Block Sports Association ruh ka la jop ïa ka jingïalehkai kyrdan U-14, da 2-0 kol pyrshah ïa ka Saipung Block Sports Association, kaba dei ka namjop ba nyngkong hadien ba rem ha ka wat ïakhun ba nyngkong (sngi plie pyrda). Hynrei ha ka kyrdan ïakhun U-16, kine ki kynhun ki la ïakhaid da mar 1-1 kol.
