Ka elekshon sha ka ïing Dorbar Thaw aiñ ka Jylla ka sah mynta satang 14 sngi ba ki paidbah kin leit sha la ki jong ki jaka ba la pynkhreh da ka Election Commission ban jied ïa kita ki nongmihkhmat kiban synshar ïa ka jylla ha ki san snem ban wan. Ha kine ki shi bnai shiteng la sakhi ba ka jingshongshit ki paidbah kiba la leit ban synran ïa la ki jong ki kyrtong ha ka jingleit thep kyrteng ha ki Returning Officer na ka bynta ban pynthikna ban ïakhun ïa kane ka elekshon MLA 2023, ka la pynrhem ïa ki party, la ka long naduh ki party rit, ki party heh bad wat ïa ki kyrtong khlem seng.
Katba ki sngi ki dang ïaid shuwa ban poi ka sngi ban thep ïa ka vote, la sakhi ruh ba ki paidbah ki la synran ïa la ki jong ki kyrtong ha ki jingïalang paidbah kaba ki (kyrtong) ki pynshai paidbah ïa la ki jong ki nongrim ba ki mih ban ïakhun ïa ka elekshon. Ym lah ban len ba ka jingïarung ïamih jong ki nongïalam na kawei ka party sha kawei pat da kaba ïalam lang ïa ki nongbud ka jur bha hashuwa ban poi ka sngi thep vote bad ka jingïakob jong ki kyrtong ka long beit ba ki la jop lypa. Kane ka jingshongshit elekshon ym tang ba ka jia ha ki thaiñ nongkyndong hynrei wat ha ki jaka sor ruh.
Ki paidbah kidei ban jied da ka jingshemphang, ban peit bha ïa U/Ka ba kumno U/Ka nongmihkhmat ba kidei ban jied ym ban shu jied da ka jingsngew tang namar ba kidei kiba haïing hasem, paralok, para nongshong shnong namar baroh san snem lada bakla ban jied ka jingeh kan ym wan jia tang ha kiba kum kita kiba la bakla ban jied hynrei wat ïa kiwei ruh. Ha ka por elekshon ym lah ban leh ba ka bor jong ka pisa ruh ka treikam bha bad ha kiba kum kine ki khep ki paidbah kidei ban da puson janai shuwa ba kin shim ïa ka rai. Namar lada jia ba shim ïa ka pisa ynda ki la jop kin hap ban pynmih shuwa ïa kaei kaba ki la pynlut.
Kane kadei ruh ka nongkyntu ïa ki nongshong shnong ba katlah katïai kiar ban rai ïa ka vote jongphi ha i Bai sha ne bai burom namar kane ka long thik ba phi ïapein ïa ka hok kaba phi ïoh shisien san snem bad ki ryngkat pliah. Donkam ban pyni sha ka pyrthei ba kum kata ka ri tipbriew tipblei ban ym ngop ha ka spah pyrthei ban thied nokot ïa ka shi vote. Lehse lada u kyrtong u biang bad u ai ruh bad i bai sha, ka shong ha phi ban rai, lehse phi lah ban kyrshan ïa u hynrei wat ailad pat ba ka pisa kan thied ïa ka dor bad ka hok jongphi.
Haba phaidien sha ki snem kiba ladep, ka Iingdorbar Thawaiñ ka la dap sa tang da ki nongkhaii ym da ki nongthaw aiñ. Ka jylla Meghalaya ka long haduh katne kumba ka long mynta, ka dei na ka daw ba ki paidbah ki la bakla ban jied ïa ki nongïalam bad dei hangne ba ki jingdawa jong ka jaidbynriew ki sahkut lut bad ym don satia mano mano ruh ban patiaw bad baroh ki jingdawa ki shu kylla long politik lada phai sha ka jingdawa ILP, ka jingdawa ban pynrung ïa ka ktien Khasi ha ka Khyrnit Baphra, ka jingdawa weng ïa ki briew kiba sah ha Them Iew Mawlong, ka jingpynbeit ïa u pud u sam bad ka Reservation Policy kiwei kiwei de ki mat.
Ka jingkangar ïa ka bor pisa ka pynlong ïa ki briew ban long kiba bamsap bad ban ïaleh katba lah tang kumno ban kamai da ka lynti kaba kynriang. Ka jingbamsap ka nang pynkhlaiñ shuh shuh ia ka jingduk bad wanrah ïa ka jingsahdien. Ka jingbamsap ka kyntiew tang ïa ki katto katne ki riew ioh kabu katba ki paidbah pat kiba duk ba rangli ki nangïai im shitom bad nang bteng ban im ha ka jingduk bad ka jingjynjar. Katba ka jingbamsap ka dang don hapoh ka ri bad ka jylla jong ngi ka long kaba eh ban ïohi ïa ka jingroi jong ki kam pynroi ha ki thaiñ bad ki shnong jong ngi. Ka jingrat dyngkhong ïa ka bamsap kadei ha ki kti jong iwei pa iwei i nongshnong shnong bad ka jinglait na ka jingbamsap kan lah ban kyntiew pat ïa ka imlang ka sahlang bad khamtam ia ka dong bad ka thaiñ hi baroh kawei.
