Pynliem ka Cricket Lovers ïa ka Lumpaia ka Marbisu ïa ka Thynroit

Shillong, Rymphang 12 : Ka Cricket Lovers Sohra bad ka Marbisu CC ki la khur jingjop ha ka jingïalehkai cricket jong ka 2nd District League T20 Cricket Tournament 2023 ba la pynïaid da ka East Khasi Hills Cricket Association ha ka jingïalehkai ha ka sngi Saitjaiñ.
Ka Cricket Lovers Sohra ka la khur jingjop da kaba pynliem da 4 wicket pyrshah ïa ka Lumpaia Avengers CC katba ka Marbisu CC ka la pynliem da 1 wicket ïa ka Thynrooit SCC. Haba phai sha ka jingïalehkai kaba nyngkong, ka Lumapaïa Avengers kaba la jop ïa ka jingkynting pisa ka la kam trai ban tied nyngkong ha kaba ka la buh ka thong da 93 ron bad khyllem lut baroh ki wicket ha ki 18.4 over.
Ki rangtied jong ka kim da lah bha ban kamai ron bad dei tang u Ralphy Heinrich Diengdoh marwei uba la kamai bun ron da 24 ron na ki 22 bol bad u Mehraf Hussain Sarkar marwei u khur 4 wicket ai kamai 17 ron na ki 3-4 over na ka bynta ka Cricket Lovers Sohra.
Haba beh ïa katei ka thong ka Cricket Lovers ka la lah ban kamai 97 ron duh noh tang 6 wicket ha ki 18.4 over lyngba ka jinglah ban kamai ron u Mukhramul H Sarkar uba la kamai 45 ron na ki 36 bol katba u Orlando Nongbri u ïoh khur 3 wicket na ka bynta ka Lumpaia Avengers bad ai kamai 18 ron ha ki 4 over. Ïa ka nam Player of the Match la ïoh da u Mukhramul H Sarkar.
Ha ka jingïalehkai kaba bud hapdeng ka Marbisu CC bad Thynroit SC, ka Marbisu kaba la jop ïa ka jingkynting pisa ka la ailad ïa ka Thynroit ban tied nyngkong kaba la kamai 100 ron duh noh 9 wicket ha baroh ki 20 over. U Mandari Dkhar u ïoh ban kamai 19 ron na ki 20 bol bad u Mansuk M Kurbah u khur 3 wicket ai kamai 13 ron ha ki 4 over.
Ha ka pali tied, ka Marbisu ka la jop da ka said ha kaba ka la kynjoh sha ka 101 ron duh noh 9 wicket ha baroh ki 20 over bad dei tang u Dapkupar Nongrum uba la kamai bun ron da 23 ron na ki 29 bol bad u Shemphang Nongbri u khur 3 wicket ai kamai 21 ron ha ki 4 over. Ïa ka nam Man of the Match ha ka jingïakhun hapdeng kine ki ar tylli ki team la ïoh da u Dapkupar Nongrum uba kamai 23 ron jong ka Marbisu.