Shillong, Rymphang 12 : Ka Meghalaya ka khlem da lah ban ïalehkai bha ha kaba sdang jong ka lympung ïalehkai U-25 Col CK Nayudu Trophy ha ka jingïakhun pyrshah ïa ka Vidarbha ha ka sngi U Blei ha Nagpur da kaba kamai 126 ron bad shah pynkhyllem lut baroh ki wicket ha ka inning kaba nyngkong. Ka Vidarbha kaba la jop ïa ka jingkynting pisa ka la kam ban kawang bol nyngkong. Ha ka pali tied, ka Vidarbha ka kamai 129 ron duh noh tang 1 wicket bad lamkhmat da 3 ron bad ka dang sah sa khyndai wicket ha kti.
Ki saw ngut ki rangtied ka Meghalaya ki la kamai shiphew ron tam hynrei dei tang u Joydeepan Deb uba kamai 33 ron. U Joydeepan Deb ha ryngkat u Anish Charak uba kamai 19 ron ki buh 41 ron ha ka jingduh noh ïa ki hynriew wicket. U Rohit Shah u kamai 27 ron bad u Kevin Christopher 10 ron.
Ka Vidarbha ka don mynta ha ka kyrdan ba lai na ka Group E bad ka dang don ha ka lynti ïaid ban kynjoh sha ka kyrdan ba kham shakhlieh lada ka pynliem ïa ka Meghalaya ha kane ka jingïakhun. Ka Vidarbha ka la sdang da kaba lah ban ïalehkai bha ha ka inning kaba nyngkong ha kaba baroh ki arngut ki rangtied sdang ki la kamai shiteng spah ron.
Ha kane ka sngi ka Vidarbha ka la dei ban pyndep khlem da duh wicket tad haduh ba u Manish Sharma u ïoh ban pynhap 1 wicket ai kamai 34 ron kata ïa ka wicket u Satyam Bhoyar uba kamai 51 ron.
