52.65 klur tyngka kurup pisa bad drok ka tnad election na kylleng ki District ka jylla
Shillong Rymphang 10 : U Chief Electoral Officer (CEO) ka jylla u Bah Frederick Kharkongor ula pyntip ba ki kynhun peitpyrman jong ka tnad Election kila ïoh ban kurup ïa ka pisa, ki jingai sngewbha, ki jingdih pynbuaid bad drok kiba shongdor haduh T.52.65 Klur na kylleng ki District ka Jylla.
U Bah Kharkongor ula ïathuh ba ki kynhun peitpyrman kila treikam borbah ha kaban peitngor bad ban tehlakam ïaka jingpynbeij ne jingpyn ngop ïaki nongthep vote da kaba sam ïaka pisa, ki jingai sngewbha, kyiad, drug ne kino kino ki jingdih pynbuaid.
Ula ïathuh ba naduh ka sngi ba la pynbna paidbah ïaka tarik elekshon ne ka jingpyntreikam ïa ka Model Code of Conduct haduh ka 27 tarik u Rymphang, ki kynhun peitngor jong ka tnad Election kila ïoh ban kurup haduh T.52.65 Klur tyngka kaba kynthup ïa ka pisa, ka kyiad, drok, ki jingai sngew bha bad ki jingdih pynbuaid.
U CEO ula ong, ka jingkurup kaba bun eh ka dei na u drug uba la shongdor T.29 klur tam.
Ha kaba ïadei bad ka jingud jingnam jong ki paidbah ba ka jingtalasi kala jur shaba palat, kaba la pynthud ruh ïaka leit ka wan jong ki paidbah kiba lui lui, naka liang u CEO ula kyntu ïa ki paidbah ba kin long kiba ïai shah haduh ka 27 tarik u Rymphang.
Ula ong ka jingpynjur ïaka jingtalasi ha kylleng ki jaka kadei namar ba ka don ka jingpyndonkam ïa ka pisa bad ïaki jingdih pynbuaid ha ka por elekshon hynrei ula ong pat ba dei lyngba ka jingdon jong ka jingtalasi, la lah ban ïoh kurup ïaka pisa bad ïa u drug bad kane kala ïarap shibun ban tehlakam ïa ki kam sniew haka jylla.
Haba kylli haduh katno klur ka tnad Election kan pynlut naka bynta ban pynlong ïaka MLA Election 2023 ha ka jylla, u Bah FR Kharkongor ula ong ka jingpynlut mynta ka kynti kan kham bun namar bala nang pynkha shuh shuh ïa ki jaka thep vote bad wat ki pulit ki ban pahara haka por elekshon kiba wan na kiwei pat ki jylla ruh kila wan poi dang kloi sha ka jylla.
U CEO ula ong, ka tnad Election haduh mynta kam pat dep ban kheiñ ban diah katno kala pynlut hynrei kala jan kot pat sha ka T.40 klur hynrei kin dang kheiñ shuh bad yn sa ïoh ïaka jingkheiñ kaba thikna halor ka jingpynlut haka jingpynlong ïaka elekshon haka jylla.