Khliehriat, Jymmang 26: U Bah Niewkor Tynsong, uba na ka shnong ba khappud, na Lahaleiñ, Narpuh, mynta ka sngi u la wan poi bad ia shim bynta lang ha kane ka shong kyllaiñ myngor ha Khliehriat, u dei u nongshong shnong ba kyrpang jong ka East Jaiñtia Hills District, uba don jingduna ha ki dkhot met, ha ryngkat ki dieng duh u la lah ban poi sha kane ka jaka, dei namar ba u don ka jingsngew khia kaba jur na ka bynta ka jaitbynriew bad na ka bynta ki samla ka ri, u la ïathuh ruh ba u dei u pyrsa jong u bah Prestone Tyngsong.
Haba kren sha ki pathai khubor bad ha ryngkat ki ummat ba jaw jrup na ki khmat, u la ong “Nga dei uba don jingduna, ngam dei ban wan shane hynrei dei namar ka iohi jngai bad nga sheptieng ioh ba ka jaitbynriew jong ngi kan jah rngai noh, hooid nga kyrshan ïa i kong Santa Mary Shylla, kumta nga kyrpad ïa i kong Santa ba in sngewbha ban sngewlem ïa ki khun ka constituency, kiba la ai ïa kito ki shynpriah kti, ki kmie ki kpa ki la pynlut na ka bynta ki khun ha ki jingpule. Ka jingwan jingngi shane ka dei namar ka jingsngewsih kthang namar ka jaitbynriew ha ka duhkam duhjam, hooid nga dei u pyrsa jong u bah Prestone Tyngsong, ka jingbakla u mama jongnga ka pynjaw ummat, ngam tip aiu kan jia ïa ka jaitbynriew, lehseh ngin jaw da ka snam kumba jaw snam ha kiwei kiwei ki jylla, na kata ka daw ka jingwan jong ngi shane ka dei ba ngi kyrshan ïa u bah Ardent, ngi kwah ban pynsngewthuh noh ïa u maduh Prestone jong ngi uba la klet noh ïa ka jaitbynriew, ha ka por ba u ieng election u la ong ïa ki paidbah to kyrshan ïa nga ba ngan peit ïa ki khun ka ri khasi-jaintia, pleng mynta u la ioh ïa ka shuki u la klet noh pynban ïa ka jaitbynriew” pynpaw u bah Niewkor Tynsong.
Une u rangbah uba na khappud, u la shim bynta lang bad ki paidbah ha kane ka shnong kyllaiñ myngor haduh ban da kut bad wat hapdeng ka jingthut ki dkhot met sngewtynnad pat ban tip ba u dei uba ju don ka mynsiem kaba shit rhem ban ïa shim bynta lang ha kino kino ki mat kiba iadei bad ka ri bad ka jaitbynriew.
