Tang 2 kynta shi sngi khreh kot ka Samla, yn bteng ïa ka jingpule haka BA (English)

Jowai, Jymmang 26: Ka samla Larisa Lamin kaba pule ha ka skul Adventist Higher Secondary School, Thaslaskeiñ West Jaiñtia Hills Diatrict, kala wan haka kyrdan kaba nyngkong eh 1st Position jong ka result Higher Secondary School Leaving Certificate (HSSLC) bala pynbna da ka Meghalaya Board of School Education (MBOSE) mynta ka sngi Thohdieng.
Ka samla Larisa Lamin kaba dei ka khun jong ka kong Ardonhi Lamin naka shnong Khliehtyrshi West Jaiñtia Hills District, haka jingkren jong ka sha ki lad pathai khubor kala ong ba kam lah ban mudur ban poi haduh kane ka kyrdan ba halor, hynrei kine baroh dei lyngba jingdon ryngkat jong U Blei ha ka jingïaid lynti jong ka ban pynkhreh ïa kane ka Exam.
Ha ka juh ka por ka ai khublei kumjuh ïa ki nonghikai kiba don hajan eh ha kano kano ka por ba donkam bad ki long kiba kloi ban ai ka jingïarap, nalor kata sa ki kmie ki kpa jong ka bad ïa ki paralok kumjuh.
Na ka liang ka samla Larisa Lamin kala ïathuh ba ka jingpynkhreh jong ka ïa kane ka Exam ka long “tang 2 kynta ha ka sngi kata shi kynta hashaw ban thiah bad 1 kynta ha ka por mynstep hashwa ban leit skul”.
Kumta ka buh ka jingkyntu ïa kiwei de ki paralok samla pule da kaba ong ban poi sha ka thong jong ka jingïaleh kaba nyngkong duh donkam ka jingtrei shitom khlem da duh jingkyrmen, sa kawei ban buh ïa U Blei hakhmat bad ka jingduwai.
Ha kaba ïadei ba ka jingbteng jong ka ïa ka jingpule kala pynpaw ba ka thrang ban pule ïa ka Bachelor of Arts (BA) haka Subject English (Honours) namar kum ka samla ka don ka thong ban long ka nonghikai (Lecturer) ha ki por ban wan.
Na ka liang ka kmie jong ka kong Ardonhi Lamin ka pynpaw ïa ka jingsngewkmen kaba khraw eh ba U Blei uba la ïalam lynti ïa ka khun jong ka, kum ka kmie ka don ka jingthrang ba kan long ka samla ba don burom khnang ba kan lah ban pyndep ïa ki jingpule kiba kham shalor.
Katba na ka liang ka Principal jong ka skul ka Krostandiki Hauzek kala ong kane ka jingjop ka samla pule kala wanrah burom shi katdei eh ïa skul hi baroh kawei kaba don hapoh ka West Jaiñtia Hills. “Haoid kine baroh dei lyngba ka jingïalam bastad jong U Blei, kala ai ruh ka jingïaroh ïa ki nonghikai jong kane ka skul kiba la treishitom met bad mynsiem na ka bynta ki khynnah skul” ong ka Principal .
Shuh shuh kala ong kila don 88 ngut ki samla pule ki ban ïakhun ïa kane ka exam bad ka Percentage kala poi 87 % ka jingpass bha ki khynnah. Ha kajuh ka por kala pynsngew ba kane ka dei ka sein kaba nyngkong ïa ka skul ban ïoh rah ïa kane ka kyrdan ba hakhlieh duh bad ka la long burom kaba khraw eh ïa ka skul bad ïa ka District hi baroh kawei.
Ka samla Larisa Lamin kala poi ha kane ka kyrdan ba nyngkong da kaba ïoh Marks haduh 450 bad ïoh Distinction ha ki saw (4) tylli ki Subject kata English (87), Political Science (82), Education (91) bad Khasi (MIL) (91), ha ka Subject Sociology (79) bad ka History (71).