Wan iashim bynta ki paidbah, ki Sengbhalang, ha ka jingdawa pynbha ïa ka Reservation Policy

Khliehriat, Jymmang 26: Ki nongialam, ki dkhot jong ka Voice of The People (VPP) jong ka Khliehriat Circle, lem bad ki paidbah, ki khun samla jong ka Khliehriat Constituency bad jong ka Sutnga Saipung Constituency mynta ka sngi ki la ia mih paidbah bad la pynlong ïa ka shnong kyllaiñ myngor ha Khliehriat, hajan ka ophis u Deputy Commissioner, kane ka long kum ka dak ka jingai jingkyrshan ïa u nongialam ka VPP u bah Ardent Basaiawmoit uba ieng bad uba dang iakhun mynta ban pynkylla noh ïa ka bhah thungkam thungjam lane ka Reservation Policy kaba la i dei ban pynkylla noh katkum ka jingdawa ka por.
U nongialam ka VPP na East Jaiñtia Hills District, u bah Damewanhi Rymbai, ha ka jingkren jong u, u la bynrap ruh ba “Lada u bah Ardent u tlot ka met bad lada rah sha hospital, ka jingiakhi kaba jur bad kaba kham i shyrkhei kan jia ha ka jylla”
“Ngi la rai ruh ba lada long katba long, lada jia katba jia kane ka mat jong ka Reservation Poliicy ka dei ban iaid beit shakhmat haduh ban da jop kaba long ka jingthmu bad jingangnud”ong utei u nongialam ka VPP na Jaiñtia, u la kyntu ruh ïa ka sorkar ba ka dei ban peit bad bishar bniah bha ïa kane ka kam da kaba ong ruh ba mynta ki dang iaid da kane ka lynti kaba jai jai hynrei ioh ka por kan poi ba ki hap ban leh da kaba tyngeh, u kyntu ïa ka sorkar ba kan burom ïa kane ka jingiaid lynti kaba jai jai, u la bynrap ruh ba ka VPP kam dei kata ka party kaba mih tang ban ialap election, kam dei kata ka party kaba mih tang ban shu ïa ai tiket ha ka por election hynrei ka la dep kular ruh ba kan trei ha baroh ki por na ka bynta ka jingkylla dur ka jylla , ka ri bad ka jaitbynriew, u la ong ruh ïa ki paidbah ba kin shim ba kane ka dei tang ka jingsdang, lada ka sorkar ka ialehkai bad u paidbah, ka sorkar hi ka hap ban shim ïa ka jingkitkhlieh lada don kano kano ka jingbym shongsuk shongsaiñ “Wat pyndom bad wat pynbitar, bun ki samla kiba la bitar mynta, bun kiba sngew synei ïa kane ka jingshah shitom u bah Ardent, ka jingiamih lang jong phi ki paidbah katne ka pyni ba phi don ka jingkitkhlieh na ka bynta ka lawei ki khun ki ksiew” u la bynrap.
U la ong ruh ba ka jingmih u bah Ardent uba kren ïa kane ka mat, kaba don ka jingbym iahap tara ha kata ka thungkam thungjam hapoh ka jylla ka dei ka jingleh phylla ka jong u Blei, uba la sei ïa u nongialam kum u bah Ardent, uba nud ban kren ïa kane ka mat.
U la kyntu ruh ïa baroh ki paidbah jong ka East Jaiñtia Hills District ba kin sngewbha ban klet noh shwa ïa kata ka jingsngew pher party, hynrei ban wan ban ïa snoh kti lang shibuit shibor ban kyrshan ïa kane ka mat jingdawa ba kan long kaba jop ka ban long ruh ka jingmyntoi ïa ki khun samla, namar ba kane ka Reservation Policy ka dei kaba la rim palat katba mynta ki la bun ki jingkylla ha ka jingdon ki nongshong shnong bad bun ki jingkylla kumta ka la i dei bad donkam ban pyn kylla noh khnang ba kan nym noh ka tarajur tang shiliang.
Ka Publicity jong ka STIEH, ka kong Deiwi Tongper, ka la pynpaw ka jingsngew nguh ïa u Blei uba la pynmih ïa u bah Ardent uba la mih shakhmat bad kren ïa kane ka mat jong ka Reservation Policy ban bishar biang, namar ka jingmih une u nongialam la ioh biang ïa ka lad ban kren biang halor kane ka mat, “ym dei ba ngi ishih ïa ki jaitbynriew Garo, hynrei ngi kren ïa ka jingshisha kaba dei ka hok, namar lada peit hangne ngi don ar tylli ki District Council ,kane ka la pyni shynna ba ngi la ïa bun paid mynta, kumno kata ka jingiabhah kam pat kan dang sah hi kumjuh “Ki briew jongngi bunsien ki ju poi shakhmat, katba ha ka jingthep kam pat ki jah lut, kane ka pynduh mynsiem ïa ki khun samla kiba pule” ong ka kong Deiwi, ka la kyntu ruh ïa ki paidbah ba kin mih shakhmat ban iakhun na ka bynta ka hok jong ki samla wadkam ba kin ioh iala ka jong ka hok.
Uwei na ki riew rangbah uba na Wapung Shnong, u bah Romi Dkhar, u la ai ka jingiaraoh bad jingkyrshan ba pura ïa kane ka jingiakhi ba la lam khmat da u nongialam ka VPP, u la kyntu ruh ïa baroh ki khun ka bri u Hynñiewtrep, khynriam, u pnar, u bhoi, u war, lyngngam, maram ban ïa long kawei shitylli ban ieng, ban ïa sngewthuhjingmut lang ha kane ka jingiakhih ba la lam khmat da u bah Ardent Basaiawmoit, ha kajuh ka por u la ong ruh ban buh jingdwai ba jar jar ha kane ka jingshah thngan u bah Ardent ba u Blei un leh phylla ba ki khun samla kin iohkam iohjam nangne sha khmat“Nga ainguh ruh ïa ki sengbhalang, lada ym don ki seng ngi long kiba la shah ñiew beiñ haduh katta katta ha kiwei pat ki jaitbynriew”.
U la ong ruh ba u la dep kyntu ia u bah Kyrmen Shylla, uba dei u nongmihkhmat na Jaiñtia, ba un sngewbha ban kren eiei lem halor kane ka mat, kumjuh ruh u kyntu ïa ka kong Santa Mary Shylla ba kan kren lem halor kane mat ba kin iakren bad u myntri rangbah ka jylla ba dei ban pynthymmai noh ïa kane ka Reservation Policy, u la ai ruh ka jingkhublei ïa kito ki constituency kiba la pynjop ïa ka party VPP bad pynmih ïa ki nongmihkhmat ka VPP.
Kiba la ai jingkren ki kynthup ruh, u President ka Federation of Khasi Jaiñtia and Garo People East Jaiñtia Hills District, u bah Micheal Chyrmang, u President ka Jaiñtia National Council, u bah Wanshwa Suting, President HANM Women Wing, ka kong Bythygrace Dkhar, President UHM, u bah Brosenly Siangshai bad kiwei kiwei.