Phah jingthoh u CM sha Delhi ban pynrung ïa ka ktien Khasi bad Garo ha ka eksamin thungkam Gramin Dak
Shillong, Jymmang 26 : U Myntri Rangbah ka Jylla Conrad K Sangma, ula phah da ka shithi sha New Delhi ban kyrpad na ka bynta ban pynrung lang ïa ka ktien Khasi bad Garo ha ka eksam thungkam Gramin Dak Sevak, Branch Post Master bad Assistant Branch Post Master ha ki BPO ba don ha Jylla Meghalaya, ka ban sa long shen.
U Conrad ula phah ïa kane ka shithi ha ka 23 tarik Jymmang sha u Myntri ka Ministry of Communication u Ashwini Vaishnaw haba kyrpad ïa ka Ministry ba kan pynkylla ïa ka draft model notification jong ka Department of Post, kaba buh kongsan ïa ka ktien Hindi bad English kum ka ktien lajong, kaba donkam ha ka jingthungkam ïa ki Gamin Dak Sevak ha Meghalaya.
“Kane ka kyndon kan pynduna ïa ka lad ïohkam jong ki samla trai Jylla namar ka jinghap ban ïakhun bad ki samla wad kam kiba na shabar ka Jylla kiba lah ban ïoh bun marks ha kine ki artylli ki ktien (Hindi bad English)” ong u Conrad.
Kat kum ka jingong jong u, “Napdeng ki samla kiba shah jied na shabar ka Jylla, khyndiat eh ki ban wan shimti ïa ka kam ha Meghalaya namar ka jinglong kyndong bad ka jinglong ki jaka. Wat kito kiba wan shimti ïa ka kam ki la jied ban kynriah noh shala ki jong ki Jylla da kaba jied ïa ka lad ba ki ïoh kat kum ka Service Rule ba don jong ki Nongtrei Postal hadien ba ki la dep shakri shisnem. Namar kata, ka jingthmu ban buh ïa ki BPO ha ki Shnong Nongkyndong ka Jylla Meghalaya kan long kaba shah jop noh”.
“Na kata ka daw, nga kyrpad ïa ka Ministry jong phi ban pynkylla ïa ka Draft Model Notification jong ka Department of Post da kaba buh kongsan ba dei ban nang bad tip ïa ka Ktien lajong ba kren ha Jylla Meghalaya. Kane ka lah ban dei ka Ktien Khasi ne Garo kum ka ktien lajong na ka bynta ki samla wadkam ba kin ïoh jied. Kane kan long ha ryngkat ka ktien Hindi bad English kumba la leh ha Assam, Manipur bad Mizoram” ong u Conrad.
Haba pynpaw ba ka jingthungkam kan sa sdang noh shen, u Conrad ula ong “Nga Kyrpad ïa phi (AshwiniVaishnaw) ba phin mynjur ïa ka jingkyrpad ka Meghalaya namar kane kan ailad ia ki samla bala nang la stad bad ba khlem kam ka Jylla ba kin shim kabu ïa ka lad ha ka ban ïohkam ïohjam”.
Lah ban kdew hangne ba ka seng FKJGP dang ha kine ki khyndiat sngi ka la leit dawa ia ka Sorkar Jylla ban tuklar halor kane ka eskam thungkam hapoh ka Department of Post ka Sorkar Pdeng halor ka jingbuh kongsan ïa ka ktien Hindi bad English kum ki ktien lajong.