Shillong, Jymmang 26 : Ka Sorkar Jylla ka la pynbna haduh 6 tylli ki jaka kum ki ‘Thymmei’ ne Epicentre jong ka khlam sniang ne African Swine Fever, kaba la wan lyngshop mynta ha kylleng ki jaka ka Ri-lum Khasi bad Ri-lum Garo.
Kane ka jingpynbna ka la mih na u Secretary ka Tnad Animal Husbandry & Veterinary, hadien ka jingpynthikna kaba la wan na ka jingleh test ïa ki snam sniang ha North Eastern Regional Disease Diagnostic Laboratory (NERDDL) Guwahati.
Kat kum ka jingpyntip u Secretary, ka Tnad kala ïoh pdiang ïa ka kaiphod leh test naka NERDDL naduh ka 10 tarik u Jymmang.
U Pyntip ba ki jaka bala pynbna kum ki ‘Thymmei’ ka khlam sniang ki kynthup ïa ka Shnong ba don Gingo pig farm ha West Garo Hills, ka Masighat ha South Garo Hills, ka Syllei U Lar, Madan bad Mawlyngkhung kiba don ha Ri-bhoi District bad ka Tiehsaw kaba don ha Nongstoin.
Ka Tnad Animal Husbandry kala pynmih ruh ïa ki jingmaham halor kiei ki kam ba dei ban leh bad kiei ki bym dei ban leh ha kine ki jaka haba pynjari ruh da ka containment zone ha kine ki jaka ban lah tehlakam ïa ka jingsaphriang jong kane ka jingpang.
