Paw ka skul Mynken bad Alpha haka eksamin SSLC, rung ka Patharkhmah Govt HSS haka Top 10 ka HSSLC
Nongpoh, Jymmang 25: 3 ngut ki khynnah pule na Ri-Bhoi kila ioh ban rung haka Top 20 bad Top 10 jong ka eksamin SSLC bad HSSLC bala pynbna da ka MBOSE mynta ka sngi, kaba long ka jingsarong kaba khraw ïaki kmie ki kpa, ki nonghikai hadien ka jinglah jong ki ban lehbha ïaka eksamin SSLC bad HSSLC ban pawkhmat ruh na Ri-Bhoi District.
Kitei ki samla ki kynthup ïaka Samla Hanika Barim naka skul Mynken Christian Higher Secondary School, Bhoirymbong, kaba la rung haka kyrdan ba 15 jong ka Top 20 haka eksamin SSLC kaba la ioh ban khur haduh 549 marks bad ioh distinction ha baroh 6 tylli ki Subject, ka Samla Saphirihun Lyngdoh naka skul Alpha English Higher Secondary School Nongpoh kaba la rung haka kyrdan ba 18 jong ka Top 20 ka eksamin SSLC kala ioh ban khur haduh 546 marks bad ioh distinction baroh 6 tylli ki Subject.
Katba haka eksamin HSSLC ka skul Patharkhmah Govt. Higher Secondary School haka sien ba nyngkong eh kala ioh ban rung haka kyrdan Top 10 hadien ka jinglah ban leh bha bad wan shakhmat jong u samla Samla Banpynshngainlang Thangkhiew u ba la rung haka kyrdan ba 4 jong ka Top 10 haka eksamin HSSLC bad khur haduh 445 marks na baroh 6 tylli ki Subject.
Haba ioh ban ïakren bad ka Samla Saphirihun Lyngdoh naka skul Alpha English HSS naka liang katei ka samla kala pynpaw ka jingsngewkmen ka ba khraw hadien ba ki jingtrei shitom jong ka baroh kila urlong bad ioh ban kheit ïa u soh ba thiang mynta ka sngi hapdeng ka jingkmen kaba khraw ryngkat ka jing ainguh ïa u Blei ba dei lyngba ka jingdon ryngkat jong u ba kala poi sha katei ka thong.
Ka la ai khublei ïa ki nonghikai bad ïaki bahaïing kiba ju don ha syndah ban kyrshan lang ha kane ka jingïakhun jong ka ïaka eksamin matrik bad don ruh ka jingangnud ban pule Science ban bteng ïaka jingpule ba kham shalor ryngkat ka jingai mynsiem ïaki para samla ba kim dei ban pynlut kai bad pynsyrwa ïaka por hynrei ban minot thop ban pynlut bun kynta haka jingpule khnang ba kin poi sha ka thong haka jingim jong ki.
U samla Banpynshngainlang Thangkhiew, u la pynpaw, ba kane ka jingkot jong u ha kane ka thong ka dei hi ka jingminot bad ka jingtreishitom ha ka jingpynkhreh ïa ka eksam HSSLC khamtam ka jingai mynsiem bad jingshemphang na ki nonghikai bad ki bahaïing hasem baroh bad kyrmen skhem skhem ruh ba un dang bteng ban leh bha haki jingpule ba kham shalor.