Shillong, Nailar 29 : Ki nongrep bad nongri jingri ha ka thaiñ Nongthliew ki la hap ban jaw ummat namar ki jingri jong ki khamtam kum ki sniang ki la iap noh hadien ka jingïoh jingpang African Swine Flu (AFS) kaba la sar ha kine ki khyndiat sngi kiba la dep.
Halor katei ka jingmad jingeh ki nongshong shnong, ha ka 29 tarik u Nailar, 2023, ka Hynñiewtrep Achik National Movement (HANM) Nongthliew Circle ha ka jingïalam u samla John Mawlong, President ka la wan ban ïakren bad ki ophisar ha Directorate Animal Husbandry and Veterinary ka Sorkar Jylla ha Shillong.
Haba kren sha ki lad pathai khubor hadien ka jingwan ïakren bad ki ophisar, u samla John Mawlong, u la ong ba ka seng ka wan ban pynsngew ïa katei ka jingeh bad na ka liang ki ophisar ki la ai ki jingpynshai
U la ong ba ki ophisar ka tnad ki la kular ban hiar sha katei ka thaiñ ban pynlong ïa ki prokram jingpynshai kumno ban ïada na kum kane ka jingpang, ki lad jingïarap kum ka Insurance nalor kiwei ki lad.
Da kaba pynpaw ba ka jingïap ki sniang ka dei kaba man la ka sngi, u la ong ba ka thaiñ Nongthliew ka dei kaba shaniah ha ka kam rep bad ka kam ri jingri ruh ka long ban ïarap ha ka kam rep.
Halor ki Veterinary Centre ban sumar ïa ki jingri, u la ong ba ka seng ka dang phah jingthoh sha ka Sorkar Jylla namar ka Centre kaba don mynta ha Umthlong ka hap sha East Khasi Hills bad ka Eastern West Khasi Hills ka dei ban ïoh noh la ka jong.
U la ong ba ki don ki nongri jingri kiba leit phah sumar ha katei ka Cetre hynrei kim ju kham ïoh dawai ei ei bad na ka liang kan sa thoh sha u MLA ka thaiñ ban wanrah ïa ka Dispensary ha katei ka jaka.
