Nongpoh, Naiwieng 21: Bunsien haba poi ki khun sha ka burom la ka long ha kano kano jait kam, ka long shisha ka jingkmen bad ka jinghun mynsiem ïa ki kmie kpa bad teng teng haba ki kmie ki kpa ki iohi ba ki khun ki la poi sha ka burom ym don pat ka ksiar ka rupa ne ka spah ka phew hakhmat jongki bad dei tang ka jingkmen bad ka jinghun mynsiem ba ki don shisha ïa kata ka kyrdan ba ki la kit kum ki kmie ki kpa.
Kane ka jingshisha ka la paw ruh mynta ka sngi ha Parade Ground jong ka North Eastern Police Academy ha Umsaw, Ri Bhoi, ha kaba bun ki kmie ki kpa ki tuid da ki ummat jong ka jingkmen, hadien ba ki khun jong ki, ki la pyndep ïa ka jingshah ai jinghikai na katei ka jaka pule bad ba la leh burom ruh ïa ki da katei ka NEPA ban shimti pat ïa kata ka lyngkor kum ki nongtrei na ka bynta ban shakri ïa ka bha ka miat bad ka jingkiew shaphrang jong ka jylla bad ka ri hi baroh kawei.
Da ki spah ngut ki kmie ki kpa jong ki pulit SI bad ki Dy. SP na kylleng ki jylla ba kynthup naduh ka jylla Assam, Arunachal Pradesh, Mizoram, Tripura, bad Nagaland ki la wan ban ai mynsiem ïa la ki khun ha kane ka sngi ba ki khun ki la ioh ïa kata ka burom kaba ki la pyndep ïa ki jingpule kumba la buh da ka sorkar shuwa ba kin shakri pat sha ki paidbah kumba la bynshet kam da ka sorkar.
Haba kren halor kane ka bynta bad kumba la sakhi ruh ha kane ka sngi, ym don kita ki kmie ki kpa kiba wan ban sakhi ïa la ki khun tang ban shu pyndep rukom, hynrei ka jingkmen na thwei ki dohnud ki kmie ki kpa ka la mih shabar tad haduh ba don ki kmie ki kpa kiba la jaw ummat da ka jingkmen, kaba dei hadien ba ki iohi ïa u ne ka khun ki poi sha ka burom kum kita ki nongshakri paidbah ba la bynshet kam da ka sorkar.
Kumba la lap ruh, kawei ka longkmie na Assam, tang mar ïa kynduh ïa u khun hadien ba la dep ka jingleh burom, ka la kdup ïa la u khun da ka jingieit bad ki ummat ka jingkmen ki la shu tuid hi na ka khmat jongka, kaba long shisha ka jingai mynsiem wat ïa kiwei kiwei ki khun samla ka jylla bad ka ri, ba kum ki khun ki dei ban trei shitom bad ki dei ruh ban sngewthuh ïa ka jingkyrpang ki kmie ki kpa ïa la ki khun. Lada ki khun hi ki poi sha ka burom la ka long ha kano kano ka jaid kam, ym don pat ki kyntien ban kren da kumwei ïa ka jingkmen ki kmie ki kpa haduh ba jaw da ki ummat ka jingkmen haba ki ioh ïa ki khun kiba tip briew tip bleit bad ha kine ki sngi bun pat ki kmie ki kpa ki jaw ummat haba thiah mynmiet bad ka daw hi ka long ba bun ki khun ki la shah ïalam bakla bad ki leh ïa ki jaid kam ba kum ki kmei ki kpa kiba la pun la kha kim lah satia ban pdiang ba ka jingangnud hi ïa ki khun ba kin long kita ki khun kiba long briew man briew.
