Jam ka Meghalaya Youth League sha ka wat ïakhun sngi ba phra, jop ka Saipung bad ka Mawshynrut

Shillong, Nailur 08: Ka lympung ïalehkai jong ka Meghalaya Youth League ka la jam mynta sha ka wat ïakhun sngi ba phra (Match Day 8) ha ka Sngi Saitjaiñ, ha katei ka sngi la sakhi ïa ar tylli ki synjuk ïalehkai ba kynthup ïa ka Saipung Block Sports Association bad ka Mawshynrut Sports Association kiba la lah ban wanrah jingkylla ha ka miej kheiñ point hadien ka namjop.
Kane ka lympung ba la pynlong da ka Meghalaya Football Association ha ryngkat ka jingïatreilang bad ka Sorkar jylla Meghalaya.
Ka resol jong ki jingïalehkai ha ka Zone B ki la long kumba long barabor, ha kaba ha ka kyrdan ïalehkai U-14, ka West Jaintia District Sports Association ka la jop da 4-0 kol ïa ka Laskein Block Sports Association, katba ka Amlarem Block Sports Association ka la pynliem da 6-0 kol ïa ka Saipung.
Hynrei, haba poi sha ka kyrdan ïalehkai U-16, ka Saipung ka la pynliem ïa ka Amlarem da 3-1 kol ban knieh ïa ka kyrdan ba ar na ka Group. Ka West Jaintia, ka la lah ban jop ha baroh ar kyrdan, kata ban jop da 7-1 kol ïa ka Laskein.
Ha ka thup ïakhun jong ka Zone C, ka Sohra Sports Association ka la ïoh ban khur ïa ka jingjop kaba nyngkong ha kane ka League da 2-1 kol ïa ka Riwar Mihngi Football Association ha ka kyrdan ïakhun U-14. Bad dei tang kane ka jingïalehkai ba la pynlong na ka thup jong ka Zone C ha katei ka taïew.
Ka Riwar Mihngi, ka la jop ha ka kyrdan U-16 da 3-1 kol ïa ka, kaba dei ruh ka namjop kaba nyngkong ïa ka ban jam shalor ka Western Ri-Bhoi Sports Association ha ka thup kheiñ point. Ka Western Ri-Bhoi ka la liem ha ka Ri-Bhoi District Sports Association da 2-0 kol.
Ha ka Zone D, ka Nongstoin ka la pynliem ïa ka Pyndengumiong da 2-1 kol ha ka U-14, katba ka Mawkyrwat District Sports Association ka la jop salit da 1 kol ïa ka Eastern Border Sports Association. Ka jingïakhun hapdeng ka Tyrsad Area SA bad ka Mawshynrut ka la kut ha ka jingïakhaid.
Ki jingïakhun ha ka U-16 hapdeng kine ki kynhun la sakhi ïa ka Mawshynrut kaba la pynliem ïa ka Tyrsad da 3-2 kol. Ka Eastern Border ka la pynliem da 5-3 kol ïa ka Mawkyrwat. Ka Pyndengumiong ka la ïakhaid da mar 2 kol bad ka Nongstoin ha ka U-16, ban bteng bat kyrdan nyngkong na kane ka zone, hynrei ka dang tam tang khyndiat hadien ba ka Eastern Border ka khur ïa ka jingjop. Katba ka Mawshynrut, ka la ïoh ban kyntiew ïalade sha ka kyrdan ba lai hadien ba jop ïa ka Tyrsad Area.