Shillong, Nailar 28: Ka lympung BSF Inter command Women Competition 2024 ba kynthup ïa ki jingïalehkai bapher bapher kum ka Wrestling, Boxing, Judo, Arm wrestling, Weight lifting bad ka Powerlifting la pynhap pyrda noh ha ka Sngi Balang (28 tarik Nailar 2024) ha ryngkat ka phuh ka phieng ha Frontier Headquarters BSF Meghalaya. Ha kane ka lympung la wan ïashimbynta haduh 70 ngut ki kynthei ïalehkai na ka Eastern Command bad 50 ngut ki players na ka Western Command BSF kiba la ïashimbynta ha kane ka lympung.
U Abu Taher Mondal, Minister of Power, C&RD Dept. jong ka Sorkar jylla Meghalaya u la wan sakhilang ïa ka sngi pynkut kum u Kongsan ha ryngkat ka jingïadonlang u Harbax Singh Dhillon, IG BSF Meghalaya Frontier, Lt Gen. Vikash Lakhera, AVSM,SM, DG Assam Riffles, Maj Gen Jai Singh Bainsla, SM, ADG Assam Riffles, Danesh Rana, IPS, IG CRPF, NES.
Ka jingwan sakhi jong kine ki heh sorkar ka la long ka jing ai mynsiem ïa ki nongïashimbynta bad ruh ïa ka lympung baroh kawei.
Ha kane ka sngi khylliap pyrda u kongsan u la ai khublei ïa ki nongjop ha ki kyrdan bapher bapher a kaba pynpaw ba ka dei lyngba ka jingtrei shitom jong ki ba ki la poi sha ka thong. Ha kane ka sngi la pynlong ruh ïa ka prokram pyni nam kolshor kaba itynnad bha da ki khynnah skul jong ka BSF School.
Haba ai jingkren ha kane ka sngi, u Abu Taher Mondal u la pynksan ïa ka jingdonkam jong ka Sport ban tei ïa ka imlang sahlang kaba khlain bad kaba koit ba khiah khamtam ïa kiba dang samla. U Kongsan u la kdew ruh ba kum kine ki jingïakop ym tang ba ki pynpaw ïa ka sap jingtbit hynrei ki ïarap shibun eh ïa ka koit ka khiah ha ka bor pyrkhat jong ki nongïashimbynta. U la ai khublei ruh ïa ka jingaiti bad ka jingïatreilang jong ki nongïashimbynta bad u la ïaroh ïa ka BSF kaba la shim ïa ka bynta ha ka ban ïada ïa ki pud ki sam jong ka India bad ban pynrung ïa ka kolshor ïalehkai hapdeng ki shipai shuwa ba un khylliap pyrda noh ïa kane ka lympung kaba seisoh bad kaba pynïatylli ïa ki nongïashimbynta.
