SSA Third Division 2024: Khur jingjop ka Iaityllilang SC bad ka Umpling SC
Khyrwit hat trick u Elewell Kurbah
Shillong, Nailar 28: Ka Iaityllilang SC bad ka Umpling SC ki la ïoh ban khur pura lai point hadien ba ki la jop ïa ki jingïalehkai ba la long ha ka Sngi Balang jong ka lympung Third Division 2024 ba la pynïaid da ka Shillong Sports Association ha SSA Ground, Polo.
Haba phai sha ka jingïalehkai kaba nyngkong, ka Iaityllilang SC ka la pynjemkhnap ïa ka Krang SC da 6-1 kol. Ha kane ka jingïakhun u Elewell Kurbah u la khyrwit da ka hat trick (42, 55 & 85 minit), u Joinborlang Kharumnuid u la thep ar kol ha ka 52 bad 86 minit, nangta kawei na u Melawantei Kharmuti (90+2min). U Herly Nongbri (58 min) u la ïoh ban thep shi kol na bynta ka Krang SC.
Haba phai pat sha ka jingïalehkai kaba ar, la sakhi ïa ka Umpling SC kaba la pynliem noh ïa ka Lumdiengjri SC da 5-1 kol. U Mebankitdor Nongkynrih (42min), u Lalremuaia Rynthlei (57min), Augustar Nongbri (59min), Jonas Nongbri (62min) bad u Henry Suting (85min) ki la ïoh ban pynkhihjar mar kawei na bynta ka Umpling SC.
Ka shi kol na ka Lumdiengjri SC la thep da u Wanshan Khonglam ha ka minit ba 65.
Ki ar tylli ki jingïalehkai ha ka Sngi Hat Majai ha ka Shillong Sports Association Third Division 2024 la sakhi ïa ka Pomlakrai SC bad ka Mawpat SC kiba la khur 3 point hadien ba jop ïa ki jingïalehkai.
Ka Pomlakrai SC ka la pynliem ïa ka Nongmensong SC da tang 1 kol, bad ïa kane ka shi kol la thep da u Edawanmi Wahlang ha ka minit ba 20.
Nangta ka Mawpat SC ka la pynliem ïa ka Lumparing SC da 3-1 kol. Dei ka Lumparing SC kaba la lamkhmat nyngkong lyngba ka kol ba la kum thep hi da u Danial Shadap (15min). Hynrei ka Mawpat SC ka la wanphai ban pynkhih lai kol ban khur shalade ïa ki lai point ba kongsan, ka kol pynïakhaid la thep da u Everson Malieh (34min) nangta ar kol na u Dikorta Nongrum (57 & 81min).
Mynta ka sngi kin don ar tylli ki jingïakhun, kaba nyngkong ha ka por 12:45 baje mynsngi, ka Gorkha Association bad ka Lawmali SC, bud ha ka por 3:45 baje nohphaisngi hapdeng ka Sanmer SC bad ka Rynjah SC, ha SSA Ground, Polo.