Ïoh pdiang ka USTM da ka Aadhvika National Award lyngba ka Dr. Rani Pathak Das
“Ba ka burom bad ka jingïaroh ka leit sha baroh ki kynhun treikam hapoh ka USTM, Meghalaya bad kane ka jingioh pdiang jong ka ïa kane ka khusnam ruh kan nym urlong lada kam ioh kata ka jingkyrshan na ki para nongtrei ha ki bynta bapher bapher jong ka jingtreikam ban kyntiew ïa ka pule ka puthi lyngba ka USTM Meghalaya”.
Nongpoh, Nailur 23: Ka long ka burom bad ka jingsngewkmen ym tang ïa ka University of Science & Technology, Khanapara ha Ri Bhoi bad ka jingioh pdiang kawei na ka Public Relation Officer ka USTM ïa ka khusnam ba la tip kum ka ‘Aadhvika National Award 2023’ kan long ruh ka burom bad ka nam ïa ka Ri Bhoi District bad ka jylla hi baroh kawei.
Kane ka Public Relation Officer ka USTM, Baridua, Khanapara kaba la ioh pdiang ïa katei ka khusnam ka dei ka Dr. Rani Pathak Das, kaba trei kum ka Public Relation Officer jong ka University of Science and Technology Meghalaya (USTM).
Ïa kane ka khusnam la sam da u Jual Oram, uba dei u Minister barim ka sorkar pdeng ha ka jigndonlang u MB Jayaram, Chairman, PRCI, ka Geetha Shankar, National President, PRCI ha ka jingpynkup burom ba la pynlong ha Civil Services Officers Institute Auditorium Chanakyapuri ha New Delhi.
Kumba la pynpaw, kane ka Aadhvika National Award ka dei ka khusnam ba la ju ai burom man la u snem ïa ki riew kynthei lyngba ka Public Relation Council of India (PRCI) bad ha kane ka kynti katei ka Public Relation Officer ka USTM ruh ka la ioh pdiang ïa katei ka khusnam halor ki kam ba ka la trei ha katei ka skulbah jong ka USTM, Meghalaya.
Kane khusnam la bhah ruh ha ki 7 tylli ki bynta jong ka Aadhvika Award kaba ki ai burom kyrpang ïa ki jingjop jong ki riew kynthei bad ba la sam ruh ha ka 17th Global Communication Conclave ka Public Relation Council of India, ha kaba ka Dr. Rani Pathak Das na USTM ka dei kawei na ka longkmei kaba la ioh pdiang ïa kane ka khusnam.
Haba ioh pdiang ïa kane ka khusnam, ka Dr. Rani Pathak Das ka la ong, “ Ba ka burom bad ka jingïaroh ka leit sha baroh ki kynhun treikam hapoh ka USTM, Meghalaya bad kane ka jingioh pdiang jong ka ïa kane ka khusnam ruh kan nym urlong lada kam ioh kata ka jingkyrshan na ki para nongtrei ha ki bynta bapher bapher jong ka jingtreikam ban kyntiew ïa ka pule ka puthi lyngba ka USTM Meghalaya”.
Shuh shuh, ka la ong ruh ba ka ai khublei kyrpang ïa ka Public Relation Council of India kaba la shim ïa ka bynta ba hakhmat ban ai ïa kane ka burom ba ka la ioh bad ha kajuh ka por ruh ka la pynpaw ba kino kino ki Longkmie kim dei ban duh mynsiem haba ki trei ïa kano kano ka kam bad ka jingïatrei ryngkat bad ki paidbah na ka bynta ka bha ka miat kam shym la sepei haba ngi don kata ka mynsiem ban shakri ïa ka imlang ka shalang, ka la bynrap.