Ïoh nongkitkam thymmai ka Kur Snaitang (Shillong Zone), u Bah Arbor kum u President

Mawkyrwat, Risaw 09: Ka Kur Snaitang jong ka Shillong Zone ka la pynlong ka General Meeting kaba lai jong baroh ki kur kiba shong basah ha sor Shillong bad khap sor ha Shillong Polytechnic Hall, Mawlai Kyntonmassar, East Khasi Hills District.
Ha kane ka jingïakynduhlang la ïashimbynta shitrhem da kiba bun ki Kur, naduh ki longkñi, ki longkmie, ki khun samla shynrang bad kynthei ha kaba ïa ka jingïalang la pynïaid da u General Secretary Central Body, u bah W.L. Snaitang bad uba la pynbud ruh ki kyntien sneng kyntu ha kaba u la ban jur ïa ki khun samla, ki kñi bad baroh ki dkhot jong ka kur ba kin long kiba ai buit bad ruh ban nym buhrieh ïa ki sap ki phong kiba u Blei U la ai ha ki da kaba kin pyndonkam hok ïa ka bad ymdei ban khñium haba trei na ka bynta ka kur.
“Ka Kur ka la roi ha ki kam ba bha bad ruh ha ki kam ba sniew namar ka la dei ka kur kaba ïar ha ka Bri u Hynñiew trep”, ong u bah snaitang. Namarkata, ula ban jur na ka bynta ka shongkha shongman, ka kheiñ kur kheiñ kha bad kumta ter ter.
Ki nongkitkam ba thymmai ki long President u Arbor Snaitang, Vice President u H. Mandaren Snaitang, Secretary u Allan D Robert Snaitang, Assistant Secretary u Skhemboklang Snaitang, Treasurer ka Sweet Mary Snaitang, Social Welfare Secretary ka Tidolis Snaitang bad phra ngut ki dkhot.
La ïoh ïa ka jingkren khublei na ka Social Welfare Secretary ka Shillong Zone, ka kong Tidolis Snaitang bad pynwai ïa ka jingïalang da ka jingdwai bad kyrkhu pynwai na u Secretary ka Raibah Zone, u Y Ehkupar Snaitang.
Ha kawei pat ka jingïalang ha kane ka sngi la ïoh ruh ban sam ïa ki khusnam sha ki 2 (ar) ngut ki samla kiba wan shakhmat ha ki jingpule, kita ki long sha ka Steffi Niza W. Snaitang kaba la ïoh ha ka 2nd Position ha ka HSSLC MBOSE 2023 kaba dei na ka Science Stream bad ka Chelsy Remisha W. Snaitang ICSE Exam (94.5%).