Bym phah nongsaid aiñ ka sorkar Meghalaya sahkut ka mokotduma jong ki nonghikai ha Supreme Court

Nongstoiñ, Risaw 9: Ka mokotduma kaba la mudui da ki nonghikai sorkar kiba la shah weng kam ha ka sorkar MDA I ha ki snem ba la dep, sha ka Ïingbishar ba hakhlieh duh ka ri ka Supreme Court, ka la kynjoh lai snem saw bnai haduh kine ki sngi, ong u babu Dominik Lyngkhoi uwei na ki nonghikai uba la ngat lang ha katei ka apot.
Utei u babu u la ong ruh ba ki don haduh shispah tam ki nonghikai kiba la shah weng, hynrei hadien ba la mudui da ka mokotduma ki don kiba la shah thung biang ha ka kam. Hynrei ki don pat ki bym shym la shah thung biang namar ka jingshah ai daw ha kiba bun rukom.
Nalor kata u la ong ruh ba ki don sa kumba phra phew saw ngut ki nonghikai ha ka thup kyrteng jong ka mokotduma, hynrei na kitei ki phra phew saw ki don kiba dang ïoh ïa ka tulop, katba laiphew khyndai ngut pat naduh ba la register ïa ka moukotduma kim shym la ïoh tulop shuh wat shi tyngka ruh.
Haba kylli la ka Supreme Court ba don burom ka la shim bishar ne em ïa katei ka mokotduma, utei u babu u la ong ba ka Ïing bishar Supreme Court ba don burom, ka la shim bishar la laisien lai wat. Hynrei kaba lyngngoh ka long ba na ka liang ka sorkar Meghalaya kam shym la phah kino kino ki muktiar ban ïasaid ha ka por ba shim bishar ïa ka mokotduma.
U babu Lyngkhoi u la ong ruh ba ka jingbym don jong u muktiar na ka liang ka sorkar Meghalaya, ka la pynsahteng bad pynslem ïa ka Ïingbishar ba kan ai ïa ka rai la kan pynksan ïa ki nonghikai ne ïa ka sorkar.
U la ong ruh ba ha kawei ka sien u la phah ïa ka kurim ban leit sei pisa na Bank da ka cheque, hynrei ym shym lah ban sei bad haba leit ban ïa u Branch Manager u la ong ba ym lah shuh ban sei ïa ka pisa, namar ba ki bor ba halor ki la phah khang noh ïa ki Account number jong ki. Ha kajuh ka por u la bynrap ba naduh ba la shah weng noh na ka kam, ki jingeh kiba bun rukom ki la ban ïa ki long ïing long sem jong kitei ki lai phew khyndai ngut ki nonghikai kat haduh ba kim don lad shuh ban kyrshan skul ïa ki khun.
Nalor kata ki don napdeng jong ki kiba hap leit bylla thang rnga sha khlaw, namar kim don ka jaka ban rep ban riang, don kiba hap leit bylla katba ïoh hynrei naduh u snem 2020 haduh kine ki sngi ka bylla ka sngi ka la nang kyrduh.
Kiba don jaka ban rep ban riang ruh kim myntoi shuh namar ka jingshah lynshop ha ki bor ka mariang ka jia man u snem, ka khaïi ka pateng ruh ka la nang hiar ki ïew ki hat ki la nang rit, ki mar ki mata ki nang kiew dor katba nang mih ki sngi ka dor ka mur jong ki mar rep ka la hiar shaba palat pud kbad ban leit die ha ïew tang ka bai kit bai bah ruh kam mih satia.
U la ong ruh ba lada shitom ki khun ki kti la hap ban shu sngap mynthi lane shu leit thied da ki dawai kiba malu mala na ki Pharmacy ne ki kubiraij kiba ai dawai kynbat bad don ruh kiba shu shah kumto namar ym don lad shuh da kumwei.
U la ong ba lada na ka liang ka sorkar Meghalaya ka phah ïa ki muktiar ban ïasaid, wat lada ka Supreme Court ba don burom kan rai pynrem ïa ki nonghikai bad pynksan ïa ka sorkar ruh, ki hun ka mynsiem, namar ki sngewthuh shai ba ha ka jingïaleh ka don beit ka rai kaba khatduh kata don u ba rem bad u ba jop.