Pynkylla ka Tnat I&B ïa ki bai ai jingtip CBC lyngba ki FM Radio shimet hadien 7 snem
Shillong, Risaw 09 : Ka jingïaid iew jong ki FM channel shimet ha ka ri ha kaba ki don palat 380 tylli ki channel ha ki ktien bapher bapher bad ha jan baroh ki jylla jong ka ri ka la pynlong ba kine ki dei ki rynsan kiba donkam bha ïa ka Sorkar Pdeng ba kan ai jingtip shaphang ki polisi bad ki prokram jong ka Sorkar kiba ai jingïarap ïa ki briew ba kin ïoh ïa ki jingmyntoi jong ki skhim bad ki prokram na ka bynta ka bha ka miat. Ha kaba ïadei bad kane, ka tnat Information & Broadcasting ka la ai jingmynjur ïa ki dor ba thymmai na ka bynta ki jingpynbna lyngba ki FM radio station shaphang ki polisi bad ki prokram katkum ki jingai jingmut ka Rate Structure Committee kaba ka la sdang. Kane ka long u mawmer ha ki jingpyrshang jong ka tnat ban pynthikna ïa ka rukom buh dor kaba ïahap bad kaba lah ban kyrshan ïa ki FM radio station shimet.
Ki dor ba thymmai ba la ai jingmynjur da ka tnat ha u bnai Nailur, 2023 ki kynthup ka jingkyntiew kaba 43% jong ka nongrim jong ka jingbuhdor da kaba pyrkhat ruh ïa ka jingkiew dor na ka bynta ka samoi hapdeng u Nohprah 2015 haduh u Lber 2023. Lyngba kane ka jingkyntiew, ka dor Gross Base na ka bynta ki jingpynbna lyngba ki FM radio kan kiew na ka T 52 sha ka T 74 ïa man ka 10 sekon. La leh ïa kane khnang ban don ka jingryntih bad ki dor ba ïaid mynta. Ka jingkyntiew ïa ka dor Gross base kan ïarap ruh ïa palat 400 tylli ki Community Radio Station kiba dang treikam ha ka ri.
Shuh shuh, ka tnat ka la rai ban bteng ïa ka rukom khein ïa ki dorkatkum ki nongbah. Kane ka rukom khein ka peit ïa ki bynta bapher bapher kum ka jingdon briew ha ka nongbah bad ka jingdon ki nongsngapkatkum ki jingtip kiba ïoh na ka India Readership Survey (IRS) jong u snem 2019.
Lyngba kane ka rukom khein bad ka jingkyntiew ïa ka dor base rate, jan baroh ki FM Radio Station shimet kin ïoh jingmyntoi na ki jingai jingmut ba thymmai halor ki dor ha ki percentage bapher bapher kiba shong ha ka jingdon ki nongsngap bad kane kan ai jingmyntoi ruh ïa ki FM station bad ki briew ba ka CBC ka ai jingshakri. Katkum kane ka rukom khein, ka dor na ka bynta 106 tylli ki station kan kiew da 100 %, ka jingkiew kaba 50 haduh 100% ïa 81 tylli ki station, bad ka jingkiew ka bym tam ïa ka 50% ïa 65 tylli ki station ïa kiba don jingtip shaphang ka jingdon ki nongsngap.
Ïa ka Rate Structure Committee na ka bynta ki FM Radio Station shimet la sdang da ka tnat ha une u snem ba la dep ban peit bad ai jingmut shaphang ki dor ba thymmai ïa kiba la pynkylla khatduh ha u snem 2015.
Ka Committee ka la ai ïa ki jingmut jong ka hadien ba ka la pynlong shibun ki jingïalang bad ki riewshemphang ha kane ka kam bad ruh kito kiba don bynta ha kane ka kam ha ryngkat ka jingshim jingmut na ki kynhun kum ka Association of Radio Operators of India.