Nongpoh, Risaw 09 : Na ka daw ka jingsniew palat ka surok ïaid paidbah shaba palat liam na Bhoirymbong sha Khyndewso bad na Nongthymmai sha Mawbsein bad kaba la wan rah ruh ïa ka jingsyrtok ha ka leit ka wan ki paidbah, ka Ri Bhoi Students Unon (RBSU) ka la kyrpad ïa ka sorkar jylla lyngba ka tnad PWD ba kan thaw shuwa ïa ki lad ki lynti tang bam maramot ïa katei ka surok namar ka jingsniew palat ka surok ka la wan rah ïa ka jingeh kaba khraw ïa ki nongleit nognwan lyngba katei ka surok sniew.
Ka seng RBSU ka la mih ruh shakhmat ban kren halor kane ka jingeh ki paidbah na ka daw ka jingsniew palat katei ka surok kam dei satia tang ba ka la ioh sngew ïa ka jingud jingnam jong ki paidbah, hynrei kum ki nongïalam ki la iohi bad lap ruh da la ki jong ki khmat halor ka jingsniew katei ka surok.
Haba ïa kren bad ki Nongthoh Khubor, u President ka RBSU, u Samla Everjoy Nongpluh u la ong kum ka seng kaba ieng ba shakri na ka bynta ka eh ka shon ki paidbah ka dap shisha ka mynsiem jong ka jingsngewkhia bad ka daw ka long ba ka seng ka la lap da la ki jong ki khmat halor ka jingsniew katei ka surok naduh na Bhoirymbong sha Khyndewso bad na ka Shnong Nongthymmai sha ka shnong Mawbsein.
U la ong ruh kane ka surok ka dei kaba la pyndonkam da ki phew tylli ki shnong ba hap ha ka thaiñ Ri Bhoi Mihngi bad ka dei ruh ka surok kaba lah ban pynïasoh sha ka jylla Assam bad ka jinglong jingman jong kane ka surok pat ka la ktah shisha ïa ki nongïalam ha kaba ki paidbah nongleit nongwan ki la syrtok ha ka leit ka wan ha kaba ha shi lynter ka surok la dap tang da ki thliew suda.
“Kaba kham sngewkhia ka long ba tang shu slap la long kum ka pung dohkha bad ka jingsniew kane ka surok ka la buh jingeh khamtam ïa kiba pang ba shitom bad ka jingsniew kane ka surok la shem jingeh ruh ban leit ban wan na ka bynta ki Longkmie kiba pun ba kha” ong u Samla Everjoy Nongpluh, bad bynrap ruh ka seng kam shym la pyrshah ïa ka sorkar ne ïa ka tnad PWD ne wat ïa ki Nongmihkhmat namar ka seng ka la ioh jingtip ba la don ka jingmang tyngka ba siang rong thymmai noh ïa kane ka surok, hynrei namar ba ka dang shim por ka seng ka la shu kyrpad ïa ka tnad PWD ba kan shu shim khia tang ban maramot shipor katba ym pat lah ban siang rong thymmai ïa katei ka surok kumba la thmu da ka sorkar” u la bynrap.
Shuh shuh, u la ong ruh ha kawei ka bynta ka seng ka sngewkmen ruh ban tip ba ka sorkar lyngba ka tnad PWD ka la dep ban khot tender ban pynbha ïa katei ka surok ban suk ki paidbah ha ka leit ka wan, hynrei namar ba dang dang shim por ban leh ïa kata kumba la mang da ka sorkar la donkam ban maramot shuwa malu mala tang ban nym buh jingeh ïa ki paidbah ha ka leit ka wan khamtam ka jingsniew ka surok ka la ktah shisha ha ka leit ka wan ki paidbah khamtam kiba pang ba shitom bad ki longkmie kiba pun ba kha, u la bynrap.
