Ïoh kem biang ki Pulit ka Ri Bhoi ïa 2 ngut ki Koidi ba lait phet na Ri Bhoi sha Goalpara Assam
Nongpoh, Jymmang 03: Da ka jingbudien bad ka jingïaitrei shitom ki Pulit ka Ri Bhoi la ioh biang ban kem ïa ki 2 ngut ki Koidi kiba lait phet na Civil Hospital Nongpoh ha ka por ba ki dang phah leit sumar ïa ki.
Ïa kane la pyntip da u Senior Superintendent of Police ka Ri Bhoi, u V.S Rathore haba phah ïa ka kyrwoh sha ki nongtoh khubor.
Kine ki ar ngut ki Koidi ba la lait phet ha ka por ba dang phah leit sumar ha Civil Hospital Nongpoh ki kynthup ïa u Sunil Das, 29 snem ka rta na ka Goalpara Assam, uba la lait phet ha ka 15tarik u Naiwieng 2024 bad ki Pulit ki la ioh ban kem biang ïa u ha ka 29 tarik u Jymmang 2025.
La ong ruh ba la ioh ban kem ïa u Sunil Das, ka dei da ka jingïarap lang ki Pulit ka North Garo Hills. Une u runar u dei ruh uba la shah rai pynrem nyngkong eh ha ka Case ba la register ha Nongpoh Police Station katkum ka Case N0. 48(03)2022 u/s 224 IPC. La ïathuh ruh ba u la shah rai pynrem biang ha ki kam runar jong u ba la register case ha Nongpoh Nongpoh Women Police Station katkum ka Case No. 07(12)2018 u/s 5(l)(m)(n)/6 jong ka POCSO Act, ha kaba la rai pynshitom ïa u da kaba set phathok shi jingim.
Uwei pat u Koidi ba la lait phet la tip kyrteng kum u Pappu Chettri, 32 snem ka rta, ba shong basah ha Mawsyntai bad u la shah register case ha Nongpoh Women Police Station katkum ka Case No. 59(10)2019 u/s 341/363/376(2)(I) IPC, uba la phet tuh na Nongpoh Civil Hospital ha ka 15 tarik u Naiwieng 2025, ba la ioh krem ruh da da ka jingïarap ki Pulit ka North Garo Hills.
La ïathruh ba kine ki 2 ngut ki Koidi, ki dei kiba la lait phet ha kajuh ka sngi kata ha ka 15 tarik u Naiwieng 2025 bad ki la leit ban phet rieh sha Goalpara District, Assam, da kaba ai kyrteng pat da kumwei ïa lade.
Shuh shuh, la ong ruh ba ïa u Sunil Das la dep phah sha District Jail ha Mawsyntai bad u Pappu Chettri pat un sa phah sha Jail lashai ka sngi, namar ba ki kynhun ki Pulit leit kem ki dang wan phai na Goalpara ban phah shwa sha ka District Court la shai ka sngi, ong ka kyrwoh na u heh Pulit ka Ri Bhoi.