Shillong, Jylliew 03: Kum shi bynta jong ka The Himalayan Cleanup 2025 campaign, ka tnat Environment and Traditional Ecosystems kaba ha Martin Luther Christian University (MLCU), Shillong, ka la pynlong ïa ka jingpynkhuid ïa ka jaka sawdong jong ka university bad kumjuh ruh sawdong ki jaka jong ka shnong Nongrah bad ka ïew Lapalang.
Kaei kaba la pynlong ïa kane ka jingsdang ka long ba ka jingpynkhuid kam dei ban long tang na ka dew met hynrei ruh halor ka jingthrang jong ka university ban buh ka jingkheiñ halor ka sawdong sawkun lyngba ka waste and brand audit. Ka MLCU ka pynpaw ka jingsngew sarong ba kadei tang ma ka ha Meghalaya ba kan pynlong ïa kum kane ka audit kaba hapoh ka The Himalayan Cleanup programme.
Ïa ka audit, la leh da ki samla pule ka tnat department, kiba la ïarap ban pynithuh ïa kiba noh synniang kiba halor duh haba ïadei bad ka jingjaboh kaba mih na ki plastic ha kane ka thaiñ. Ki jaboh kiba kham paw khmat napdeng kiwei pat ki ñuit ki ñier ki dei ki single-use plastic, ki sachet, bad ki tiar ba la song bun jait ne multilayer packaging-item kiba don jingïadei bad ki tiar ba ju pyndonkam da ki nongthied. Kane ka jingkheiñ ka long kaba kongsan na ka bynta ki nongthaw aiñ bad kan pynkupbor ïa ki nongïalam shnong ba kin ong ïa ki nongpynmih ba ki dei ban shim ka jingkitkhlieh halor ka jingshah ktah ka sawdong sawkun.
Ki samla pule ba la shim bynta ym tang ba ki la ïoh jingmyntoi ban ïohmad halor ka waste and brand auditing hynrei ki la mad ruh ïa ka jingmut jong ka jingdon ka jingkitkhlieh ha ka imlang sahlang.
Lyngba kine ki jingsdang ba kum kine, na ka liang ka MLCU ka la ïai pynskhem biang ïa la ka jingangnud ban ïada ïa ka sawdong sawkun bad ka la khot ïa baroh ban ïatreilang ban wanrah biang ïa ka thaiñ Himalaya da ka jingitynnad kaba naduh ka tynrai.
