Shillong, Jylliew, 03: U nongïalam jong ka United Democratic Party Bah Kyrmen Shylla uba long ruh u Myntri ka Sorkar Jylla u la kynthoh halor ka jingïathuh lypa jong ka Voice of the People Party (VPP) ba ka seng riewlum kaba heh tam ha ka jylla kan sa shah khylliap lama ha snem 2028.
“Ban ong ba ka UDP kan sa shah khylliap lama ha u snem 2028 ka long kaba bakla shikatdei eh. Nga don hangne. Nga dang don bad ka UDP bad ngan ïai don beit ha ka UDP. Kumjuh ruh baroh 12 ngut ki MLA ki don hangne bad bun ki sa nang wan ha u snem 2028 ban kyrshan ïa ka party bad ban shakri ïa ka jylla,” ong u Bah Shylla ha ka jingïakren bad ki lad pathai khubor.
U la pynpaw ruh ka jingsngewskhem ba ka party kan sa nang leh bha shuh shuh ha ka elekshon sha ka Ingdorbar Thawaiñ ka ban sa long ha u snem 2028.
Haba kyntait ban kynthoh shuh shuh u Bah Shylla u la ong, “ngam don eiei ban kynthoh shuh shuh halor kane. Kano kano ka party ka lah ban kren pyrshah ïano ïano namar ha kaba kut ym don mano mano ruh ba ïaroh ïa kiwei lane ban leit pynkhlaiñ ïa kiwei pat ki party. Haoid, kin wad beit ïa ki lad ki lynti ban tan ïa ngi shapoh.”
“Hynrei haba peit ïa ka jingkyrshan kaba ngi ïoh na ki paidbah, nga don ka jingsngew ba ym don mano mano ruh ba lah ban ktah ïa ngi. Ngi la don hangne bad ngin ïai don beit hangne bad ka por kan sa poi ba ki briew jong ngi kin ai pura ïa ka jingshaniah bad kin ai ruh ïa ka rai jong ki bad shi sien ka sngi ngin dang bteng ban long ki nongïalam ha ka jylla,” u la bynrap.
Dang shen u Dr. Jemino Mawthoh uba long u General Secretary jong ka UDP u la mih noh na ka party da kaba aidaw ba ka dei ka daw shimet.
Katba u President ka UDP Bah Metbah Lyngdoh haba pdiang ïa ka shithi iehnohkam jong u Dr. Mawthoh u la kyntait ba ka don kano kano ka jingïakynad hapoh ka party.
