Mawkyrwat, Jylliew 25 : U Myntri ka Sorkar Jylla uba khmih ïa ka Water Resources Bah Coming One Ymbon ha ka sngi Balang u la plie paidbah ïa ka Ophis jong ka Water Resources Department kaba la shna thymmai ha Mawkyrwat, South West Khasi Hills District.
La pyntrei ïa kane ka ophis ba thymmai jong ka Water Resources ha ka jingmang pisa kaba 1. 73 klur tyngka.
Haba kren kum u kongsan u Bah Coming One Ymbon u la kyntu bad ai mynsiem ïa ki ophisar bad ki nongtrei jong kane ka tnat bad kumjuh ruh ïa kiwei pat ki ophisar ba ki dei ban long ki briew kiba ïajan bad ki paidbah lyngba ka jingdon jong ki ïa ka mynsiem jong ka jingsngewrit. Ym tang kata, u la ai jingmut ruh ba haba wan donkam ki paidbah ha ki ophis sorkar, kum ki ophisar kim dei ban pyni ka jinglong ba khong khong lane sngewheh, namar da kane ka lah ban khanglad ne pynnoh mynsiem ïa ki paidbah kiba donkam ban ïoh ka roi ka par ha ki shnong ki thaw jong ki. Hynrei lada ki long pat kiba ryntih bad trei da ka mynsiem jong ka jingieit bad ïarap ïa ki paidbah, kata kan long ka jingkyrkhu kaba khraw ïa ki paidbah bad ïa ka ophis treikam hi baroh kawei.
Halor ka jingplie ïa ka ophis treikam kaba thymmai u la kyrkhu kyrdoh ba kane ka ophis ryngkat ki nongtrei kin sa nang ai shuh shuh ka jingshakri kaba kham bha ïa ki paidbah hapoh South West Khasi Hills District. Ha kajuh ka por ula ai ka jingïaroh ba kyrpang ruh ïa ki MLA, kata ïa u Bah Renikton Lyngdoh Tongkhar bad Bah Pius Marweiñ kiba la trei shitom ban kyntiew ïa ki kam pynroi hapoh ka distrik lyngba ka jingïatreilang bad u Myntri Rangbah ka jylla Meghalaya, u Conrad K. Sangma.
U la pynkynmaw ruh ba mynshwa haba leit sha ki lum ne wah, ka um ka long kaba dap ba shngiam bad i pa-huh pa-hai la ka long ha ka por tlang ne por lyiur, hynrei ha kane ka juk ba mynta, la ïohi ba ki wah duid ki la sdang rngad bad ka jingdon ki um ruh ka la duna bha, khamtam ha ka por tlang. U la ong namarkata, “Lada ngi leh mynthi ne leh bymsuid ñiew ha kane ka pateng ba mynta, kan nym slem shuh ba hadien kan sa wan por ba wat ïa ka lyer ba ngi ring mynsiem ka lyer ba khuid ne ka oxygen ruh ngin hap ban thep ha ki bilor”, u la ong.
U kyntu ïa ki paidbah ba kin shimkhia ban sumar bad ïada ïa ka mariang, khamtam eh ïa ki khlaw bad ki btap, khnang ba ka lawei bad ka pateng ka ban wan kan long kaba shngaiñ bad lait na ka jingkyrduh ïa ka um bad ka lyer kaba khuid.
Ha kane ka jingplie paidbah la donlang u Dr. Shankil P. Ahammed, IAS, Additional Chief Secretary jong ka Sarkar Meghalaya, ka kong Junecy F. Lyngdoh, Superintending Engineer (Water Resources), Shillong Circle, Shillong, u bah B. Jyrwa, MPS, Superintendent jong ki Pulit ka Mawkyrwat, u bah F.B. Basan, MCS, Additional Deputy Commissioner ka South West Khasi Hills District, u bah Renikton Lyngdoh Tongkhar, MLA ka Mawkyrwat Constituency, u bah Pius Marweiñ, MLA ka Ranikor Constituency bad kiwei kiwei.
